Vllaznia ka shansin të dielën të futet totalisht në garë për titull. Përballja kundër Tiranës më shumë rëndësi se kurrë gjatë këtij sezoni, ku për shkodranët vlen vetëm fitorja.
Për fatin e mirë të kuqebluve, ndeshja do të luhet në stadiumin “Loro Boriçi”, aty ku janë marrë plot 20 pikë këtë sezon, më shumë se çdo skuadër tjetër në ndeshjet e shtëpisë.
Natyrisht, nuk do të jetë e lehtë, pasi Tirana është kampionia e transfertave, duke marrë 21 pikë, për më tepër që mund të ishte e kënaqur edhe me një barazim kësaj here.
Gjendja paraqitet e mirë në kampin shkodran, sepse janë rikthyer edhe të dëmtuarit. Bulatovic ka kryer ushtrime të vogla, ndërsa Lorik Boshnjaku dhe Latifi tashmë janë në gjendjen e tyre optimale dhe po vijojnë normalisht stërvitjen. Tre titullarë të rëndësishëm të kuqebluve, të cilët kanë munguar për një kohë të gjatë.
Mungesë e sigurt është ajo e mbrojtësit Juric që vijon rikuperimin. Fitorja e fundit ndaj Kukësit ka rritur optimizmin në skuadër dhe te tifozët kuqblu, me këta ta fundit që pritet të jenë të shumtë në klasiken e futbollit shqiptar, e cila do të luhet të dielën në orën 16:00.
