Kreu i Partisë Demokratike, Sali Berisha ka pranuar për herë të parë rrezikun që PD të mbetet jashtë zgjedhjeve lokale të 14 majit.
Gjatë një takimi me demokratë të degëve 8 dhe 10 në selinë blu, Berisha tha se qeveria dhe kryeministri Edi Rama po përpiqen t’i përjashtojë nga zgjedhjet lokale.
“Duan të na përjashtojnë nga zgjedhjet, duan që ne të na bëjnë të paqenë, duan të na shndërrojnë në anonimat, megjithëse ne kemi vendimin e gjykatës, që u dha, se s’kishte si të mos jepej. Kemi ndjekur çdo frymë dhe gërmë ligji, të Kushtetutës, të Statutit, por për McGonigal kjo s’ka asnjë vlerë. Vlerë ka se kush duhet të jetë kryetari i PD-së që ata duan”, deklaroi Berisha.
Gjatë ditës së sotme kreu i KQZ-së, Ilirjan Celibashi ka dhënë një deklaratë për mediat, pasi KQZ ka miratuar listën e anëtarëve të KAZAZ-së për PS, PL dhe PSD-së por jo për Partinë Demokratike. Me logon e PD-së, në Komisionin Qendror të Zgjedhjeve janë depozituar dy lista – nga nga PD e drejtuar nga Sali Bersha dhe tjera nga “grupi Alibeaj”. Celibashi tha se situata është e tillë që duhet të konkludohet mbi legjitimitetin e personit që do duhet të përfaqësojë interesat e PD në KQZ. Sipas tij, vendimmarrja e KQZ do të jetë strikt bazuar në kodin zgjedhor. Përfaqësues “legjitim të PD në KQZ” cilësoi “Sefa” nga grupi Alibeaj.
- 2 ditë para protestës, çfarë deklaron Berisha?
Dy ditë para se së bashku me shqiptarët të dalë në shesh për t’i kërkuar Edi Ramës dorëheqjen poshtë zyrës së tij në protestën e thirrur nga Partia Demokratike, kreu i saj Sali Berisha nuk ka humbur kohë, por ka zhvilluar një takim me demokratët e degëve nr. 8 dhe 10 në Tiranë.
Teksa renditi arsyet përse qytetarët duhet të marrin pjesë në tubimin masiv të së shtunës, Berisha u ndal te afera McGonigal si skandali më i madh i qeverisë dhe e akuzoi kryeministrin për korruptimin e zyrtarit të lartë të FBI-së, për të vënë në zbatim strategjinë e shkatërrimit të PD.
Berisha tha se Rama e ka përdorur McGonigal si “vrasës me pagesë” për të goditur opozitën dhe për të hetuar lobistin e ish-kreut të PD-së, Lulzim Bashës.
“Protesta e 11 shkurtit ka ngjallur shpresat e shqiptarëve kudo që janë. Protestë e cila ka një interes të madh në mbarë botën. Afera “Rama McGonigal” është një aferë botërore. Është një aferë që ka tronditur në fushën e sigurisë, jo vetëm marrëdhëniet bilaterale, por ka tronditur këtë fushë për SHBA-në, për vendet anëtare të NATO-s dhe vendet e lira në tërësi. Aktin që ka bërë Edi Rama, mund ta ndërmerrte vetëm një fuqi armiqësore ndaj SHBA-së. Vetëm një vend armik mund të projektonte dhe t’i lejonte vetes t’i korruptojë njeriun më të çmuar të kundërzbulimit, vendit me përgjegjësi kryesore të botës. Me përmasa, kjo tejkalon çdo imagjinatë për një vend të lirë. Edi Rama s’njeh asnjë kufi. Nuk ka asnjë normë, asnjë virtyt. I lejon vetes çdo lloj akti në funksion të pushtetit të vetë. Kjo përbën një fatkeqësi të jashtëzakonshme për një komb dhe një shoqëri. Kur një kryeministër i lejon vetes çdo akt dhe veprim për të ruajtur karrigen e tij, ai nuk e dorëzon pushtetin në asnjë mënyrë. Ai njeh vetëm gjuhën e forcës dhe frikës”, tha Berisha.
Duke ripërsëritur edhe njëherë se ish-kreu i PD, Lulzim Basha mund të dënohej me 6 vite burg për pastrim parash, Berisha tha se Rama e dërgoi dosjen e tij për gjykim dhe më pas e bllokoi që të shkonte në GJykatë të Lartë, duke e përdorur procesin si mjet për kërcënimin dhe marrjen peng politikisht të ish-pasardhësit të tij në krye të selisë blu.
