Pronari i një lokali në rrugën “Besim Alla” në Tiranë, është arrestuar pasi akuzohet për veprimtari të ligjshme të lojërave të fatit. Sakaq do të procedohet penalisht dhe punonjësi i tij 20-vjeçar.
Gjatë kontrollit policor në ambient, janë sekuestruar një kompjuter dhe një aparat celular. Polici bën me dije se i arrestuari është shtetasi M. T., 29 vjeç, ndërsa i ndjekuri penalisht është shtetasi me iniciale K. V., 20 vjeç, punonjës në lokal.
“Gjatë këtij operacioni, është ushtruar kontroll në një lokal, në rrugën “Besim Alla”. Gjatë kontrollit në lokal, shërbimet e Policisë gjetën dhe sekuestruan në cilësinë e provës materiale, një kompjuter dhe një aparat celular, në të cilët ishin të hapura faqe bastesh sportive.
Në përfundim të veprimeve për këtë rast u arrestua në flagrancë pronari i lokalit, shtetasi M. T., 29 vjeç, dhe nisi procedimi penal në gjendje të lirë për shtetasin K. V., 20 vjeç, punonjës në këtë lokal. Në cilësinë e provës materiale u sekuestruan kompjuteri dhe aparati celular.”, njofton policia.
Materialet i kaluan Prokurorisë, për veprime të mëtejshme, për veprat penale “Organizimi ose ushtrimi i veprimtarive të lojërave të fatit në kundërshtim me ligjin”, “Fshehja e të ardhurave” dhe “Mospagimi i taksave dhe tatimeve”.
