Përplasja midis Erion Braçes dhe Taulant Ballës që ka nisur disa muaj më parë në Parlament, ku kreu i Grupit të PS “komandoi” deputetë e mazhorancës që t’i rrëzonin kolegut të tyre një amendament të hartuar për mbrojtjen e fermerëve dhe blegtorëve, duket se ka vijuar në heshtje.
Por me ironi të thellë dhe postime pikante “dyluftimi” është ringjallur ditën e sotme, teksa Braçe ka thumbuar Ballën për një foto që ky i fundit ka publikuar nga Lushnja, ku shihet duke konsumuar byrek në një vendstacion të njohur në hyrje të qytetit.
Në kulmin e skandalit McGonigal që ka “mbërthyer” dhe ka lënë pa fjalë kryeministrin Edi Rama, dy socialistët më të pushtetshëm në qarkun e Fierit shkëmbejnë kështu kunja dhe ironi mes tyre për një byrek.
Në postimin e drejtuesit politik të qarkut të Fierit shkruhej: “Mirëmëngjes çdo ditë takimet në Lushnje fillojnë herët, por pas një ndalese tek Vila Met Cela ku byreku dhe kosi janë të shkëlqyer. Ndërsa udhëtoni pranë Lushnjes, ka shumë e shumë arsye për t’u kthyer për një ndalesë në Qytetin e bukur të Kongresit”.
Përgjigjia e Braçes edhe jo e drejtpërdrejtë ishte goditëse për Ballën, pasi ai shkruante se nuk e konsumonte byrekun duke ditur si përgatitet gjiza, me një thumb që në largësi i hidhej edhe prodhuesve të bulmetit në vend që së bashku me qeverinë po favorizojnë përdorimin e qumështit pluhur.
“Shirat rikthehen e bimet ne toka nuk duhet te kalben prej lageshtires! Ne Goricaj, me Avni Sulen dhe punetoret e Bordit, per punen e perditshme; NUK NDALET! VO: Aaaa ndjese qe nuk po ha byrek; jo per gje po di me cfare behet gjiza!”, shkruan Braçe.
Sa i përket qumështit pluhur, pikërisht Braçe dhe Balla kanë pasur edhe një përplasje të mëhershme, ku u përfshi edhe ministrja e Bujqësisë, Frida Krifca, e cila i doli në mbrojtje vendimeve të qeverisë dhe dikasterit që drejton.
