Esli Zala, politologe shqiptare e cila jeton në Stamboll, në një lidhje direkte me studion e lajmeve të News24, tregoi sesi është situata aktualisht në Turqi pas tërmeteve të forta njëri pas tjetrit.
Ajo shprehet se nga lëkundjet e tërmetit të dytë i cili ishte i përafërt me atë të orës katër të mëngjesit me magnitudë 7.7 ballë, janë shembur tre spitale, në Hatay dhe Marash, ndërsa nuk është e qartë sesa është numri i viktimave.
Ajo u shpreh se edhe pse tërmeti nuk është ndjerë në Stamboll, qytetarët janë në alarm dhe kanë bërë çantat gati për çdo situatë.
Ajo tha se “duke qenë se para shumë vitesh sizmologët kishin parashikuar që Stambolli mund të goditet nga një tërmet i fortë”, njerëzit janë të shqetësuar.
“Epiqendra e tërmetit të dytë e njëjta, por pak më në veri, nuk është e qartë se sa viktima ka pasur më shumë, por ndërtesat që kanë qenë të lëkundura, kanë rënë të gjitha.
Në Hatay dhe Marash janë tre spitale të shembura, nuk dihet nëse ka pasur njerëz apo jo.
Edhe ne që jetojmë në Stamboll, kemi bërë çantat gati për çdo rast. Sizmologët para shumë vitesh kanë bërë me dije se Stambolli pritet të goditet nga një tërmet shumë i fortë, 8 apo 9 ballë, frika ekziston. Të gjithë janë në një situatë alarmi”, u shpreh ajo.
