Mançester Junajtid ia ka dalë të sigurojë tre pikët e radhës me një fitore 2-1 ndaj Kristal Palas në Premier Ligë. Por suksesi nuk ka pasur vetëm nota pozitive për “djajtë e kuq” të cilët kanë humbur një element me shumë cilësi si Kasemiro për ndeshjet e radhës.
Shkak është bërë një zënkë në minutën e 67 të ndeshjes kur Shlup i miqve dhe Antoni i vendasve u përplasën njëri me tjetrin. Futbollisti i Kristal Palas shtyu brazilianin në rrethimet e fushës dhe kjo solli përplasjen që u shoqërua me një zënkë masive në fushë.
Gjyqtari u ftua nga VAR që të shihte pamjet e asaj zënke, pasi Kasemiro në ato momente i kishte vënë duart në fyt Uill Hjugs. Me rishikimin e pamjeve, për kryesorin nuk kishte dyshime dhe ai i tregoi menjëherë brazilianit kartonin e kuq.
Një karton që do të ketë shumë peshë pasi i dhënë për sjellje josportive, sjell automatikisht tre ndeshje pezullim. Kështu, ai do të jetë larg fushave të lojës për sfidat ndaj Lids dhe atë ndaj Leister në kampionat.
