Seanca parlamentare e ditës së sotme është duke u zhvilluar mes kaosit, tensionit dhe përplasjeve të forta mes deputetëve të Partisë Demokratike dhe kryetares së Kuvendit, Lindita Nikolla.
Në fjalën e tij, deputeti Gazment Bardhi i kërkoi kryeparlamentares që të anulojë 15 ligjet që ka kaluar në seancën e së enjtes së kaluar, kur u përjashtuar kryedemokrati Sali Berisha dhe katër deputetët Flamur Noka, Edmond Spaho, Edi Paloka dhe Belind Këlliçi.
Gjithashtu Bardhi u ndal te skandali McGonigal, duke kërkuar që në seancë të marrë pjesë kryeministri Edi Rama dhe t’i përgjigjet pyetjeve të deputetëve të PD, të cilët kanë kërkuar interpelancë me të.
DEBATI:
Gazment Bardhi: Sipas Rregullores së Parlamentit, kur shkaktohet kaos, drejtuesi i seancës pezullon seancën plenare. Nëse kaosi vijon, ndërpritet seanca dhe vijon në seancën më të afërt plenare. Akti i vetëm që mund të bëni ju sot, nuk është miratimi i një procesverbali, por leximi i atyre 15 ligjeve që kaluat pa u dëgjuar. Keni vrarë rregulloren, nuk ka nevojë të bëheni mburojë e Ramës, mos e fshini, silleni në seancë, të japë llogari për sa kohë paguhet si kryeministër i këtij vendi. Anuloni ato ligje që keni miratuar në shkelje të rregullores. Nuk mund t’i hiqni të drejtën e fjalës Opozitës.
Lindita Nikolla: Nuk keni asgjë për procesverbalin?
Gazment Bardhi: (Nuk dëgjohet, flet pa mikrofon)
Lindita Nikolla: Keni rezerva për atë seancë, por nuk keni vërejtje për procesverbalin?
Gazment Bardhi: Për procesverbalin gjithmonë.