Për Sali Berishën dhe Partinë Demokratike afera McGonigal është skandali më i madh që ka mbërthyer kryeministrin shqiptar Edi Rama dhe një kauzë për të dalë në protestë më 11 shkurt.
Nga mbledhja e Grupit të PD, kreu i saj hodhi akuza të forta në drejtim të shefit të qeverisë se ka kryer një akt tradhtie duke goditur pas shpine kombin e tij me qëndrimin kriminal për asgjësimin e pluralizmit dhe opozitës duke përdorur një zyrtar të FBI-së.
Akuzat e Berishës nuk ranë vetëm mbi kryeministrin, por edhe mbi ambasadoren amerikane në Shqipëri, Yuri Kim, të cilën e konsideron një “McGonigal me fustan”.
Edhe pse tha se e pret që reagimi i tij ndaj saj lidhur me çështjen të cilësohet si antiamerikanizëm nga selia e Rrugës së Elbasanit, Berisha sërish shtroi pyetjen, se pse hesht Yuri Kim për skandalin që ka tronditur pushtetin e Edi Ramës.
Sipas liderit të opozitës ambasadorja i është bashkuar kryeministrit dhe Lulzim Bashës me “Kodin e Heshtjes”.
“Tre persona kanë heshtur deri sot. Ky është Edi Rama, siç e dini bëri vetëm sqarimin se pasi u përpoq ta injoronte filloi të flas për kazan e “Big Brother”. Sqarimi i vetëm se e kam mik dhe do e kem pavarësisht se ca bën drejtësia amerikane. Në kod ishte mos fol se do flas. Nuk foli Lulzim Basha dhe kur foli përsëri me kod. Nuk përmendi dot as emrin e Edi Ramës dhe as të McGonigal. Shikoni çfarë luhet në kurriz të qytetarëve. Nuk foli as guvernatorja Yuri Kim e cila në raport me opozitën është një McGonigal me fustan. E di që do e transmetojë si një qëndrim antiamerikan. Absolutisht, PD ka një besim të palëkundur te ai vend që vërtet ka McGonigal por po e arreston, se vend të dytë si ai nuk ka. U soll si McGonigal me fustan pasi kam bindjen se ajo shkelmoi kushtetutën e vendit të saj dhe timin, konventën e Vjenës dhe këto s’mund të jenë orientime të Amerikës, së vlerave, të ligjeve, të SHBA që udhëheqin me moralin dhe frymën e tyre”, u shpreh Berisha.
Ndër të tjera Berisha deklaroi se Charles McGonigal ka darkuar në Tiranë me Taulant Ballën dhe jo vetëm, pasi Rama e ka dërguar sipas “axhendës” së tij personale për të darkuar edhe me gjyqtarë e prokurorë.
“Nuk mjaftojnë për SKAP-in e partisë të gjitha këto materiale, por duhet të gjejë Gaz Bardhi akt padinë që duhet ta lexojë SKAP-i i partisë. Drejtësia duhet të fliste me forcën më të madhe, por drejtësia është pjesë e kësaj dosjeje. McGonigal darkonte jo vetëm me politikanë të inkriminuar si Taulant Balla, por edhe me gjyqtarët e prokurorët, ku të dëshironte Edi Rama”, tha Berisha.
Kujtojmë se prej një jave kreu i PD ka denoncuar implikimin në aferën McGonigal edhe të ish-ministrit të Infrastrukturës dhe Energjisë, Damian Gjiknuri, por edhe për kryebashkiakun e Tiranës, Erion Veliaj.
Madje sipas tij Veliaj ka udhëtuar me urgjencë në SHBA për të lobuar te miqtë atje për të fshehur emrin e tij pas shpërthimit të skandalit në mediat ndërkombëtare.
Ndërkohë sa i përket Gjiknurit ai cilësohet si lidhja më e fortë e rusëve në Shqipëri, teksa Berisha ka deklaruar se zotëron prova për raportin e tij miqësore me oligarkun Oleg Deripaska.
