Zyra e prokurorit të qarkut Santa Fe të New Mexicos ka njoftuar se aktori dhe producenti Alec Baldwin është akuzuar penalisht në lidhje me të shtënat fatale të vitit 2021 në xhirimet e filmit “Rust”.
Akuzat kundër Baldwin dhe armatores së kastit të filmit, Hannah Guiterrez Reed, përfshijnë dy akuza për vrasje të pavullnetshme. Avokatët e të dy të pandehurve insistuan më parë se klientët e tyre përkatës janë të pafajshëm.
Dejtoresha e kinematografisë, Halyna Hutchins u vra nga një plumb i drejtpërdrejtë i shkrepur nga një armë skenike e mbajtur në dorë nga aktori Baldwin, i cili pohon se ai nuk e tërhoqi këmbëzën e armës. Si pasojë edhe regjisori Joel Souza u qëllua dhe u plagos.
Baldwin ka pohuar se nuk ishte në dijeni se arma që qëlloi gjatë provave përmbante fishekë të vërtetë.
Në një deklaratë për CNN më 19 janar, avokati i tij e quajti vendimin e prokurorëve “një gabim të tmerrshëm drejtësie”.
Luke Nikas u shpreh: “Ky vendim shtrembëron vdekjen tragjike të Halyna Hutchins dhe përfaqëson një gabim të tmerrshëm drejtësie. Z. Baldwin nuk kishte arsye të besonte se kishte një plumb të vërtetë në armë, ose kudo në setin e xhirimeve të filmit. Ai u mbështet te profesionistët me të cilët punonte, të cilët e siguruan se arma nuk kishte fishekë të vërtetë. Ne do t’i luftojmë këto akuza dhe do të fitojmë.”
Më herët, Alec Baldwin ka ngritur një padi në Kaliforni kundër disa individëve të lidhur me filmin “Rust”. Aktori paraqiti një ankesë kundër armaturës së prodhimit Hannah Gutierrez Reed, ndihmës regjisorit David Halls, ndihmësit të armaturës Seth Kenney, dyqanit të furnizimit me armë dhe municione.
