Kryetari i Partisë Demokratike, Sali Berisha iu rikthye çështjes “Mc Conigal” këtë të Martë, gjatë fjalës së tij për mediat, para mbledhjes së kryesisë së Partisë Demokratike.
Duke iu referuar dosjes amerikane, Berisha tha se Rama kontraktoi një vrasë me pagesë për ekzekutimin e PD dhe vrasjen e pluralizmit në Shqipëri.
Kreu i PD u shpreh se përdorja e ish-shefit të FBI-së në Nju Jork nga Rama, për të goditur opozitën, “tejkalon çdo lloj limiti”.
“Mafia e Tiranës në pushtet, theksoi Berisha, është një rrezik madhor jo vetëm për shqiptarët, por edhe për SHBA, siç fakton rasti MCConigal”.
Sipas tij, rasti “McConigal” është skandali i shekullit që dëmton në mënyrë parësore imazhin e shqiptarit në SHBA dhe ajo aferë shumë herë më e zezë sesa e tregojnë dokumentet që tanimë janë publike.
“McGonigal u përdor gjithashtu edhe për afera korruptive të tjera, për licenca. Ai u shpërblye me qindra dhe miliona euro. Me 225 mijë dollarë thuhet në dokument, 500 mijë të tjera nga një bankë e Qipros, por edhe miliona të tjera, thuhet gjerësisht. Ai u angazhua nga Edi Rama për të ndihmuar miqtë e tij të ngushtë, Vangjush Dakon, Tom Doshin dhe të tjerë të shpallur ‘non grata’ nga Departamenti i Shtetit”, deklaroi Berisha.
Berisha: ‘McGonigal’ të tjerë ka edhe nëpër Europë
Ai u shpreh se “McConigal-ër, jo në atë nivel, ka dhe të tjerë në Europë dhe SHBA”.
“Fenomeni MCConigal nuk është i izoluar. Nuk është i izoluar as në qëllimin politik, nuk është përpjekur vetëm ai si lobist për shkatërrimin e opozitës, forcës politike më properëndimore dhe anti-rusë në Shqipëri. Për shkatërrimin e saj janë angazhuar haptazi me të gjithë amoralitetin me të gjitha abuzivitetin, me të gjithë aprincipialitetin edhe të tjerë dhe për të njëjtat motive, korruptive. Mafia në pushtet i Tiranës është pushteti më i rrezikshëm. S’njeh asnjë normë asnjë moral, asnjë standard.
Kjo mafie përdor korrupsionin monetar, politik, erotik dhe çdo formë tjetër korrupsioni, ky është laboratori ku eksperimentohen të gjitha format e korruptimit, ku shkon deri te ai që ishte në nivele që s’mund të imagjinohej. Rasti McConigal ndihmon shqiptarët për të kuptuar si mund të përdoret korrupsioni, jo vetëm për ti varfëruar ata, por dhe për të vrarë shpresën çdo ditë te ata. Imagjinoni çfarë efekti kanë pasur deklarata si ato të Rosninit, absolutisht të gjitha të paguara. Imagjinoni çfarë dramash janë luajtur në këtë vend, me shkatërrimin e drejtësisë dhe kthimin në pronë të partisë Socialiste. SKAP-i për të cilin mund të jenë bërë me dhjetëra qindra deklarata është sot institucioni më i diskretituar në Shqipëri. Askush se ka diskretituar veçse vetja e tij”, u shpreh Berisha.
Kërkesa e SPAK
“Do ju jap një shembull”, vijoi më tej Berisha, i cili foli për kërkesën për informacion që SPAK i dërgoi deputetit Gazment Bardhi pas kallëzimit të këtij të fundit në Prokurorinë e Posaçme.
“Deputeti Bardhi e paditi në SPAK aferën. Për të dëshmuar se ishte një mburojë e partisë, përgjigja ishte: Më sillni aktpadinë. Prokuroria e Krimeve të Rënda e mori të pandehur Lulzim Bashën për larje parash kur doli çështja Muzin. Nuk tha më sill akt-padinë, jo, aq sa kishte. Për SKAP-in e partisë pavarësisht se në të katër anët e botës ulërijë sirenat e krimit, nuk ndodh asgjë. Çfarë e pengonte sot SKAP-in të njoftonte se ka nisur hetimin. Dhe ti pyeste me radhë. A e dini se McConigal ka takuar gjyqtarë, prokurorë, këto nuk ekzistojnë për SKAP-in”, u shpreh Berisha.
Akuza ngriti dhe ndaj Lulzim Bashës.
“Rama e mbylli gojën, u zhduk pesë ditë, e mbylli gojën për 7 ditë dhe Lulzim Basha. Ai që në vend të thoshte ‘ja viktima e një komploti’, jo nuk çel gojën. Bëni një shënim dje katër reshta ku s’guxonte të përmendte Ramën, pa le McConigal”, tha Berisha.
“Rama duhet të largohet menjëherë nga pushteti”. Apeli për protesta
Berisha theksoi se Edi Rama duhet të largohet menjëherë nga pushteti.
“S’do të ketë paqe dhe stabilitet me një njeri që jo vetëm shkelmon çdo ditë mbi liritë dhe dinjitetin e shqiptarëve, me një njeri që vjedh çdo ditë”, tha kryetari i PD.
Ai bëri apel për protesta të fuqishme.
“Të ngrihemi në protesta të fuqishme, asnjë shqiptar që ka jetuar në këtë vend që kur është shpallur pavarësia s’meriton një kryeministër si ky që s’ka asnjë parim, as flamur, as nder, as ideal përveç interesit të tij të ngushtë, karriges së tij”, u shpreh ai.
