Drejtësia në Belgjikë i ka dhënë goditjen finale një grupi me 23 anëtarë të cilët ndodheshin pas hekurave pasi akuzoheshin se midis nëntorit 2020 dhe majit 2021 kishin zbarkuar në portin e Antwerp-it 6.4 ton kokainë.
Pasi iu konfiskuan 30 milionë euro pasuri dhe u dërguan pas hekurave të gjithë anëtarët, Gjykata e Antwerp-it këtë të premte i dënoi me burgime që shkojnë deri në 13 vite për persona të caktuar, 23 të pandehurit dhe me gjoba deri në 200,000 euro.
Një prej të dënuarve është edhe anëtari shqiptar i bandë, Bledar Seferi, i cili do të vuajë 12 vite burg.
Sakaq dënimet për anëtarët e tjerë kryesorë të grupit kriminal ishin: Omar G. (13 vjet burg), Mounir El B. (11 vjet burg) Ilias El B. (12 vjet burg), Mohammed (10 vjet burg).
Hetimi për grupin rreth ish-kikboksierit Merksem, Omar ‘Patje Haemers’ G. filloi në mars të vitit 2021, pak ditë pasi u bë e ditur se hetuesit kishin goditur aplikacionin e përdorur nga rrjetet e krimit të organizuar “Sky ECC”.
“Sky” ishte kanali i preferuar i komunikimit për mafien e drogës dhe në saj të materialeve të gjetura aty u zbulua se më 15 mars, një shofer kamioni i Merksem mori një kontenier në sektorin e frutave, në të cilin dogana sapo kishte gjetur më parë 818 kilogramë kokainë. Pas arrestimit të shoferit të kamionit, detektivët kanë shkuar në kërkim të klientit të tij.
Transporti i përgjuar i kokainës i çoi hetuesit te një numër i të njohurve nga bota e drogës, të cilët tashmë ndodheshin në Dubai.
Bëhej fjalë pikërisht për ish-kikboksierin Omar ‘Patje Haemers’ G. dhe vëllezërit Mounir ‘Gino’ dhe Ilias El B. Sipas Prokurorisë Publike, ata ishin në krye të një organizate grumbullimi që kishte kompanitë e veta të transportit. Grupi mbajti kontakte me klientët, duke përfshirë grupet e krimit holandez dhe shqiptar dhe me furnitorë nga Amerika e Jugut. Ilias El B. udhëzoi stafin e tij të bënte foto para, gjatë dhe pas largimit të kontejnerit nga porti sepse pala tjetër (kolumbianët, red.) e kërkonin atë.
Omar G. dhe Gino kanë transportuar sasi të mëdha kokaine në portin e Antwerpen për llogari të shqiptarëve. Grupi u përfshi në gjashtëmbëdhjetë tërheqje të suksesshme në gjashtë muaj, duke arritur 6.4 ton. Një numër transportesh dështuan dhe u sekuestruan 1.7 ton kokainë .
Në krye ishte krimineli i drogës Omar ‘Patje Haemers’ G. Ai jetonte në Merksem, por tani qëndron në Dubai. Gjykata e dënoi me dënimin më të rëndë: trembëdhjetë vjet burg, 200 mijë euro gjobë dhe konfiskim prej 5.5 milionë euro. Ai u ndihmua nga vëllezërit Mounir dhe Ilias E.B. nga Deurne, të cilët gjithashtu nuk janë gjetur në Belgjikë për një kohë. Ata morën respektivisht njëmbëdhjetë dhe dymbëdhjetë vjet burg, gjobë prej 200 mijë eurosh dhe konfiskim prej 6 milionë e 6.2 milionë eurosh.
Një nga të dyshuarit është shqiptari Bledar Seferi (përfaqësues i Kompanisë ‘Bello’”, një sindikatë shqiptare që konsiderohet si një nga më të fuqishmet dhe më të pasurat në Evropë. Në vitin 2020, policia italiane i dha një goditje të fortë Kompanisë “Bello”, ndërsa në Shqipëri pasuria e Seferit dhe e familjes u sekuestrua si pjesë e një procedure antikorrupsion.
Në Belgjikë ai u dënua me dhjetë vjet burg në nëntor 2019 si drejtues i një organizate kriminale të përfshirë në ngritjen e plantacioneve të kanabisit dhe kontrabandën e kokainës, ndërsa ishte dënuar më parë edhe për kontrabandë droge në Itali.
Bledari përveç dënimit mori nga drejtësia belge edhe një gjobë prej 200 mijë euro gjobë dhe ju konfiskuan pasuri me vlerë 2.8 milionë euro.
