Një 40-vjeçar britanik, anëtari i katërt i një grupi të dyshuar të krimit të organizuar që bashkëpunonte me shqiptarët për të bërë të mundur trafikimin e njerëzve me gomone përmes Kanalit Anglez nga Franca veriore, është arrestuar nga Agjencia Kombëtare e Krimit në North Shields.
Arrestimi u bë pasi ekipet e Home Office ekzekutuan një urdhër ndalimi në një operacion që përfshin hetime mbi disa shtetas shqiptarë që shfrytëzojnë imigracionin e paligjshëm për përfitime financiare.
Arrestimi i tij është i katërti që bëhet në lidhje me aktivitetin e dyshuar kriminal që synon portet e Mbretërisë së Bashkuar. Ai është transportuar në selinë e Policisë Northumbria, ku do të bëhen hetime të mëtejshme, ndërsa u kontrollua edhe një pronë dhe një automjet pranë shtëpisë së 40-vjeçarit për të grumbulluar prova.
Duke folur për “The Chronicle” menjëherë pas bastisjes, Ndihmës Drejtor nga njësia e Hetimit Kriminal dhe Financiar, Stuart Stokes tha: “Ky është një hetim ndaj një grupi të dyshuar të krimit të organizuar që dyshohet se janë të përfshirë në ndihmën për hyrjen e paligjshme të shtetasve shqiptarë në MB”.
Ndërkohë, ministri i Emigracionit, Robert Jenrick, i cili njihet për deklaratat e tij të ashpra kundër shqiptarëve tha se “ky arrestim është një dëshmi e mëtejshme e vendosmërisë së palëkundur për të çmontuar bandat kriminale që përfitojnë nga kontrabandimi i njerëzve”.
“Kontrabandistët e njerëzve dhe ata që mendojnë të abuzojnë me ligjet tona të imigracionit nuk duhet të kenë asnjë dyshim se ne nuk do të ndalemi para asgjëje për t’u siguruar që ata të përballen me fuqinë e plotë të ligjit”, nënvizoi ai.
Në total mbi 140 persona janë dënuar sipas Aktit të Kombësisë dhe Kufijve për kalimin e paligjshëm të refugjatëve që prej qershorit të kaluar në Britaninë e Madhe.
