Këshilli i Etikës në Kuvend ka përfunduar mbledhjen për shqyrtimin e kërkesës së 7 deputetëve të Partisë Socialiste, të cilët kërkuan përjashtimin me 10 ditë nga seancat plenare për 5 deputetë të Partisë Demokratike.
Ashtu siç ishte paralajmëruar PS nuk është mjaftuar me përjashtimin që Lindita Nikolla i bëri ditën e djeshme kryedemokratit Sali Berisha, pasi ky i fundit bllokoi foltoren e Kuvendit duke kërkuar llogari për skandalin McGonigal dhe dorëheqjen e kryeministrit Edi Rama për korruptimin e zyrtarit të FBI-së.
Duke miratuar kërkesën e socialistëve, Këshilli i hap kështu rrugën e përjashtimit zyrtar Berishës dhe ligjvënësve Edi Paloka, Flamur Noka, Edmond Spaho dhe Belind Këlliçi.
Ndërkohë, kujtojmë se salla e seancave plenare u kthye ditën e djeshme në një arenë të fortë përplasjesh, ku PD kërkoi me ngulm prezencën e Ramës për të dhënë llogari lidhur me skandalin e korruptimit me 225 mijë euro të zyrtarit të FBI.
Kanë qenë deputetët socialistë Ismet Beqiraj, Petro Koçi, Denis Deliu, Arben Pëllumbi, Ermonela Felaj, Mimi Kodheli dhe Gerta Duraku ata që kanë firmosur shkresën në fjalë.
