Një ngjarje e rëndë është regjistruar mbrëmjen e sotme në qytetin e Shkodrës.
Sherri midis nipit (Bledar Troshani) dhe dajës së tij Zyhdi Shpejtimi në qendër të qytetit, pranë zyrave të Drejtorisë së Tatimeve ka degjeneruar deri në përdorimin e armëve të ftohta.
Ka qenë 78-vjeçari që ka goditur disa herë me thikë nipin e tij 44-vjeçar duke e lënë të plagosur rëndë.
Ai është dërguar me urgjencë në spital për të marrë ndihmën mjekësore dhe aktualisht ndodhet në sallën e operacionit.
Sakaq, policia ka mbërritur në vendngjarje për të sqaruar rrethanat dhe ka arrestuar pak minuta pas ngjarjes autorin, Zyhdi Shpejtimi.
“Rreth orës 18:15 ne lagjen “Qemal Stafa”, Shkodër është plagosur me mjet prerës shtetasi B. T. 44 vjeç banues ne lagjen Kongresi Përmetit, Shkodër Falë veprimeve te shpejta policore është bere identifikimi, kapja dhe shoqërimi ne ambientet e Komisariatit te Policisë Shkodër autori i dyshuar shtetasi Z. Sh., banues ne lagjen “Kongresi Përmetit”, Shkodër”, njofton paraprakisht policia.
Ndërkohë po punohet për zbardhjen e rrethanave që çuan në konfliktin e përgjakur mes të afërmeve.
