Tejkalimi i shpenzimeve në fushatën zgjedhore të 25 prillit duket se do t’u kushtojë shtrenjtë 10 partive politike në vend, pasi Komisioni i Ankimeve dhe Sanksioneve (KAS) ka marrë vendim për t’i gjobitur me 500 mijë lekë gjobë.
Gjobitja për partitë politike është bërë me propozim të kreut të KQZ-së, Ilirian Celibashi duke mos kursyer as dy fuqitë e mëdha si PS dhe PD.
Partitë që janë gjobitur me 500 mijë lekë:
Partia Socialiste;
Partia Demokratike;
Lëvizja për Zhvillim Kombëtar;
Lëvizja e Legalitetit;
Bashkimi Popullor i Pensionistëve Shqiptarë;
Nisma Thurje;
Bindja Demokratike;
Partia Socialdemokrate;
Balli Kombëtar;
Balli Kombëtar Demokrat.
Ndërkohë Partia Socialiste është sanksionuar edhe me 5 milion lekë të reja, në një sanksionim të dytë.
“Vendosjen e sanksionit administrativ në masën 5.000.000 (pesë milion) lekë, sipas nenit 173, pika 9, të ligjit 10019, datë 29.12.2008 “Kodi Zgjedhor i Republikës së Shqipërisë”, i ndryshuar” për subjektin zgjedhor Partia Socialiste e Shqipërisë”, thuhet në njoftimin e KAS.
“Komisioneri ka kërkuar vendosjen e sanksionit administrativ ndaj subjektit zgjedhor Partia Socialiste e Shqipërisë për tejkalim të kufirit maksimal të shpenzimeve. KAS-i çmon se kërkesa e Komisionerit duhet të pranohet dhe ndaj subjektit të vendoset sanksioni në masën 5 (pesë) milion lekë, për shkak se është vlerë më e lartë se sa diferenca midis vlerës së shpenzuar dhe vlerës maksimale të lejuar”, vijon më tej njoftimi.
