Tre bashki në Jug të vendit që janë lënë si zona të lira për aleatët dhe nuk u përfshinë në procesin e Primareve të PD, edhe zyrtarisht do të jenë në dorën e PBDNJ-së.
Këtë e njoftoi sot kreu i Partisë Demokratike Sali Berisha teksa ka firmosur marrëveshjen për koalicion në zgjedhjet lokale të 14 majit me aleatin e tij opozitar Vangjel Dule.
Pas një shtrëngimi duarsh me Dulen, Berisha tha se koalicioni opozitar do t’i japë goditjen finale në zgjedhje sistemit monist që ka ngritur Edi Rama dhe bashkitë do t’i kthehen qytetarëve.
“Do i japim një goditje fatale sistemit monist, por nga ana tjetër synojmë t’ju kthejmë bashkitë qytetarëve shqiptarë. Ti kthejmë bashkitë në shtëpitë e përbashkëta të qytetarëve shqiptare. Qytetarët e parë të këtyre bashkie të kenë vetëdijen e plot, përgjegjësinë e plotë, për të funksionuar si shërbëtorë të këtyre qytetarëve, për të përdorur në mënyrën më transparente dhe të ndershme të gjitha burimet njerëzore dhe materiale të bashkisë. Kemi shënuar një hap të rëndësishëm në realizimin e objektivave të përbashkëta”, tha Berisha.
Sakaq, Dulevetëm 4 ditë më parë në mbledhjen e Këshillit të Përgjithshëm i Omonias bëri publik emrat e 3 kandidatëve që do të garojnë në siglën e PBDNJ për kryetar bashkie në 14 maj.
Kështu për Bashkinë e Himarës është zgjedhur të garojë Fredi Beleri, në bashkinë e Finiqit Leonidha Hristu dhe në Dropull Anastas Maneka.
