Zhurma e çuditshme që vinte nga vilat ku ata banonin, ka “marrë në qafë” tre shqiptarë në Spanjë, të cilët ishin përfshirë në kultivimin e kanabisit në banesat që ishin shndërruar në ferma të mirëfillta.
Ka qenë Garda Civile e Navarrës që ka ndërhyrë duke kontrolluar pronat nga të cilat buronte zhurma e çcuditshme, e kthyer në shqetësim për banorët e zonës.
Falë operacionit të tyre u vu në pranga një shtetas spanjoll (47 vjeç) dhe dy shqiptarë 28 dhe 23 vjeç. Edhe një person i katërt me origjinë shqiptare me urdhër arresti të prerë është kapur gjithashtu.
Ndërkohë, agjentët sekuestruan 2100 bimë marijuane, me një sasi prodhimi prej 100 kilogramësh, me vlerë 220,000 euro.
Operacioni në fjalë nisi në fillim të korrikut, kur në numrin e telefonit të Shërbimit të Qytetarëve të Gardës Civile (062) erdhi një telefonatë nga një person që raportonte se nga një shtëpi në Andosilla buronte “një zhurmë e çuditshme vazhdimisht”.
Ekipi Territorial i Policisë Gjyqësore të Gardës Civile të Navarrës (ETPJ) mori përsipër hetimet për zbardhjen e një vepre të mundshme kriminale dhe nisi ‘Operacionin BIMORE’. Pas mbikëqyrjes diskrete të shtëpisë, e cila në fillim paraqitej si e pabanuar, hetuesit vunë re se në disa pika të shtëpisë lëshohej ndriçimi brenda, si dhe dëgjohej zhurma që ishte denoncuar.
Agjentët verifikuan se shtëpia ishte e lidhur në mënyrë të paligjshme me rrjetin elektrik, gjë që tregonte për një aktivitet të mundshëm të paligjshëm brenda. Nga hetimet u zbulua se grupi kriminal përdorte një shtëpi të dytë në qytetin e Navarres, Cortes.
Pas vendimit të gjykatës, në shtëpinë Andosilla, u gjetën pesë dhoma të dedikuara ekskluzivisht për mbjelljen dhe kultivimin e marijuanës, në faza të ndryshme të lulëzimit dhe u zbuluan 1224 bimë në gjendjen e tyre maksimale të rritjes. Në shtëpinë e Cortes u sekuestruan 878 bimë marijuanë në faza të ndryshme të lulëzimit.
Në shtëpinë në Andosilla jetonte një person i ngarkuar me detyrat e ruajtjes, mbikëqyrjes dhe mbrojtjes së plantacionit, i cili nuk dilte jashtë. Ai jetonte në një shtrat të vendosur në kuzhinën ngjitur me frigoriferin dhe ushqimi i sillej nga anëtarë të tjerë të grupit kriminal.
Përgjegjësit e plantacionit morën masa të forta sigurie me kamera video vëzhgimi, vëzhgim të përhershëm nga anëtarët e organizatës, ndër të tjera. Sakaq, vetëm me mashtrimin për energjinë elektrike ata i kishin shkaktuar shtetit një dëm prej 53.000 eurosh.
