Në Kosovë është zhvilluar sot seanca e radhës gjyqësore për vrasjen që ndodhi në maj të vitit të kaluar në Ferizaj, ku vëllai i reperit “Buta” qëlloi për vdekje mikun e tij “Reefa”.
Qëndrim Januzi ka dalë ditën e sotëm para gjykatës duke pranuar vrasjen e shokut të tij Gazmend Hyseni, ndërsa ka treguar pendesë para togave të zeza.
Megjithatë ai ka mohuar se të shtënat me armë që i morën jetën Hysenit kanë qenë të qëllimshme dhe të paramenduara.
“Më vjen keq, i shprehi ngushëllime familjes, nuk e mohoj se e kam kryer një akt kriminal, mirëpo nuk pajtohem me cilësimet juridike nga ana e prokurorisë, pasi që nuk e kam bërë me dashje apo me ndonjë paramendim”, ka deklaruar Januzi.
Ngjarja e rëndë ndodhi më 28 maj të vitit të kaluar, pas një përplasjeje me armë në rrugën ‘Rexhep Bislimi’ në qytetin e Ferizajt.
Pasi e vrau me armë mikun e tij, vëllai i reperit të njohur i shokoi të gjithë me veprimin e tij, pasi i qëndroi mbi kokë Hysenit deri sa ai dha shpirt, për t’u siguruar që e kishte vrarë.
Qëndrim Januzi për më tepër sulmoi me armë edhe policinë kur uniformat blu mbërritën në vendngjarje. Ai mbeti i plagosur në shkëmbimin e zjarrit me policinë pasi nuk pranoi të dorëzohej.
