Vladimir Putin është shprehur se fitorja e Rusisë në Ukrainë “është e garantuar” duke shtuar se ai po përpiqet t’i japë fund luftës që ka vazhduar në Donbas, ku separatistët e mbështetur nga Moska po luftojnë forcat ukrainase që nga viti 2014.
Këto komente Putin i bëri gjatë një vizite në një fabrikë armësh në qytetin e tij të lindjes në Shën Petersburg.
Presidenti rus u tha punëtorëve dhe gazetarëve: “Fitorja është e garantuar, nuk kam asnjë dyshim për të”.
Ai pohoi gjithashtu se pushtimi i Moskës kishte për qëllim të ndalonte një “luftë” që ka qenë e ndezur në Ukrainën lindore për shumë vite.
Ai pretendoi se Rusia ka kërkuar prej kohësh të negociojë një zgjidhje të konfliktit në zemrën industriale lindore të Ukrainës, Donbas.
“Operacionet luftarake në shkallë të gjerë që përfshijnë armë të rënda, artileri, tanke dhe avionë nuk janë ndalur në Donbas që nga viti 2014,” tha ai.
“Gjithçka që po bëjmë sot, si pjesë e operacionit special ushtarak, është një përpjekje për të ndalur këtë luftë. Ky është kuptimi i operacionit tonë – mbrojtja e njerëzve që jetojnë në ato territore.’
Putin e ka shpjeguar vendimin e tij për të dërguar trupa në Ukrainë më 24 shkurt me nevojën për të kryer ‘çmilitarizimin’ dhe ‘denazifikimin’ e Ukrainës.
Gjithashtu të mërkurën, Putin mori pjesë në takimin me veteranët gjatë vizitës së së mërkurës në Shën Petersburg për të shënuar 80-vjetorin e thyerjes së rrethimit nazist të qytetit nga Ushtria e Kuqe më 18 janar 1943.
Rrethimi i qytetit që atëherë quhej Leningrad zgjati gati 900 ditë dhe u hoq plotësisht vetëm në janar 1944, duke shënuar një nga faqet më të përgjakshme të Luftës së Dytë Botërore.
Rreth 1 milion njerëz vdiqën në Leningrad gjatë rrethimit, shumica e tyre nga uria.
Putin vendosi të mërkurën një kurorë lulesh në varrezat përkujtimore të Piskaryov të qytetit, ku u varrosën 420,000 viktima civile të rrethimit dhe 70,000 ushtarë sovjetikë.
Ai gjithashtu vendosi lule në një pjesë ku vëllai i tij, vdiq gjatë rrethimit të Leningradit dhe u varros në një varr masiv.
