Partia Demokratike, dega Elbasan, ka kallëzuar penalisht drejtoreshën e kopështit nr.9, Valbona Lala, pasi dyshohet se kjo e fundit ka mbledhur kartat e identitetit bashkë me numrat duke kërkuar mbështetje për Partinë Socialiste në zgjedhjet e 14 majit.
Sipas PD, kallëzimi vjen pas indikacioneve dhe referimeve të marra nga nënpunës të këtij institucioni publik arsimor, për rastin e drejtueses në fjalë.
“Është trishtuese dhe e paprecedentë se si një drejtuese e një institucioni arsimor angazhohet për mbledhjen e numrave të kartave të identitetit, duke kërkuar mbështetje për Partinë Socialiste! Është trishtuese se si një funksionar që është emëruar për të mësuar dije dhe kulturë tek fëmijët, angazhohet në veprimtari anti-demokratike dhe anti-ligjore në funksion të ruajtjes së pozitave të saj si drejtuese institucioni”, thuhet në njoftimin e PD.
Ndër të tjera, PD shton se do të ndjekë të gjithë hapat ligjore përballë çdo funksionari publik që zgjedh të vendoset në shërbim të Partisë Socialiste.
