“Disa lojtarë të Vitesses u bashkuan të mërkurën me skuadrën, pasi në dy javët e fundit ishin të angazhuar me ekipet përfaqësuese të vendeve të tyre.
Mes tyre, edhe Milot Rashica, i cili bëri debutimin e tij zyrtar me Kombëtaren e Shqipërisë, që është kualifikuar për në Kampionatin Europian “Francë 2016””, citonte deklarata e bërë publike nga klubi holandez, Vitesse.
“Ndërkohë që të enjten e kaluar ishte i angazhuar me Përfaqësuesen U-21 të Shqipërisë, duke u aktivizuar në ndeshjen ndaj Greqisë, e përfunduar 0-0, e vlefshme për Grupin 4 të eleminatoreve të Europianit U-21, ditën e martë, Rashica bëri debutimin e tij me Kombëtaren e madhe të Shqipërisë. Në ndeshjen ndaj Luksemburgut, Rashica u aktivizua në fushë nga trajneri i përfaqësueses, Gianni De Biasi, në minutën e 61’.
Menjëherë pas futjes në fushë të Rashicës, Shqipëria shënoi dy herë në portën kundërshtare, duke siguruar fitoren përfundimtare në shifrat 2-0. Këtë verë, vetëm dy muaj më vonë, Shqipëria do të jetë e pranishme në Kampionatin Europian që do të zhvillohet në Francë”, përfundon deklarata e klubit të Vitesses, në lidhje me debutimin e Milot Rashicës.
