Dëshmia e dy të mbijetuarve në vrasjen e ndodhur në lokalin “Kobra City” në Prizren, ku Dibran Hoxhaj qëlloi për vdekje të riun nga Kukësi Visart Cengun, ka treguar se të rinjtë nga Shqipëria janë ndjekur në momentin që po largoheshin nga klubi, pa e paguar faturën.
Sipas emisionit “Betimit për Drejtësi”, ata kanë deklaruar se Dibran Hoxhaj, i njohur si Kobra, ka qëlluar në drejtim të automjetit ende pa u nisur vetura.
“Të njëjtat burime theksojnë se fillimisht ishte plagosur personi R.Sh në këmbë, i cili kishte qenë i ulur në pjesën e pasme. Ndërsa në lëvizje e sipër nga të shtënat ka mbetur i vdekur Visar Cengu, po ashtu i ulur në pjesën e pasme, derisa pa lëndime ka shpëtuar personi A.B që në momentin kritik ishte duke vozitur automjetin. Me të arritur policia, Hoxhaj kishte deklaruar se nuk kishte qenë prezent në momentin kritik, si dhe ishte palë e dëmtuar pasi konsumatorët kishin shtënë në drejtim të tyre,”– thuhet në pjesën e dosjes së publikuar nga “Betimi për Drejtësi”.
Drejtori i Policisë për Rajonin e Prizrenit, Faton Alija, në një intervistë për “Betimi për Drejtësi” ka folur për provat që janë gjetur në rastin “Kobra”, të cilat pritet të verifikohen. Ne mesin e tyre, ai ka thënë se nga bastisjet në lokalet përcjellëse, është gjetur një DVR, pajisje që ruan pamjet e kamerave dhe e njëjta është dërguar për ekzaminim. Pjesë e provave thotë të jetë dhe një fotografi që dyshohet të jetë publikuar nga Hoxhaj natën kritike.
“Në media, mediat janë një burim i informatave që policia i shfrytëzon dhe rrjete të ndryshme sociale ka qarkulluar një foto që dëshmon filmime apo pamje në parkingun e atij lokali atë natë, ku vërehet edhe vetura në të cilën viktimat më vonë kanë marrë plagë dhe për njërin që ka qenë vdekjeprurëse. Ajo është një dëshmi e jona deri tash që deri në një moment të caktuar kamerat kanë funksionuar”, ka thënë Alija.
Ai ka thënë se i dyshuari për vrasje është duke u hetuar edhe për manipulim me prova.
“Një prej akuzave që i vihet në barrë të dyshuarit kryesor të këtij rasti është edhe manipulimi me prova, është i dyshuar për vrasje, armë pa leje dhe manipulim me prova, pasi në dyshojmë se ky i dyshuar apo të tjerët i kanë ndihmuar që DVR-in ta largojnë prej vendit aty, ta fshehin bashkë me armën dhe gjëra të tjera personale të këtij të dyshuari. DVR nuk është gjetur, është një DVR tjetër në bastisje në vazhdim, nuk është vërtetu a ka të bëjë me lokalin apo ka të bëjë me ndonjë objekt tjetër, është gjet nga bastisjet në vazhdim të cilin e ka marrë Prishtina dhe është në fazën e ekzaminimit. Në një lokal përcjellës sepse ky ka disa lokale si lokalin këtu apo garazhe përcjellëse”, ka deklaruar Faton Alija, drejtor i Policisë për Rajonin e Prizreni
Si rrjedhojë, është arrestuar edhe një person i 7-të, po ashtu me dyshimet për manipulim me prova.
