Autoriteti Kombëtar i Ushqimit ka sekuestruar ditën e sotme një sasi prej 1 kuintal produkte mish në qarkun e Dibërs, pasi tregtohej jashtë kushteve dhe standarteve të parashikuara në ligj dhe aktet nënligjore.
“Trupat inspektuese të Autoritetit Kombëtar të Ushqimit gjatë ushtrimit të kontrolleve në katër subjekte, kanë konstatuar tregtim të mishit pa vulë dhe çertifikatë veterinare, ushtrim i aktivitetit të tregtimit të mishit i paregjistruar në QKB, në mungesë gjurmueshmërie dhe kushteve higjieno-sanitare”,-thuhet në njoftim.
Ndërkohë bëhet me dije se për shkeljet e konstatuara, trupat inspektuese të AKU-së, vendosën masat administrative me gjobë në vlerën e 460.000 lekëve, konfiskuan rreth 1 kv produkte mishi si dhe ndaj një subjekti u mor masa e menjëhershme e ndërprerjes së aktivitetit të paregjistruar.
