Ministri i Brendshëm Bledi Çuçi në një konferencë për mediat ku ka bërë edhe analizën e punës për 2022 dhe ka përcaktuar sfidat për vitin ku sapo kemi hyrë, është pyetur nga gazetarët në lidhje me çështjen e “nxehtë” që ka në duar policia, ajo e zhdukjes së Ervis Martinajt.
Teksa iu kërkua të sqarojë se deri në çfarë pike kanë arritur hetimet dhe se kur policia e shtetit do të ketë një përgjigje konkrete për fatin e “mbretit” të lojërave të fatit, Cuçi i shpëtoi përgjegjësisë duke thënë: “Nuk kemi shkop magjik”.
Sipas ministrit të Brendshëm, “policia e shtetit ka bërë punën dhe ka komunikuar me këtë gjë”.
Ai theksoi se një deklaratë zyrtare për të vërtetën rreth zhdukjes së Ervis Martinajt do të jepet vetëm kur të ketë prova.
“Ju keni qenë të informuar për veprime të ndryshme policore për zbulimin dhe zbardhjen e kësaj ngjarje. Policia vepron sipas ligjeve, dhe ka përgjegjësi ligjore. Nga policia do merrni përgjigje vetëm kur të ketë një provë të fortë për çfarë ka ngjarë me të. Pjesa e skenarëve thashethemeve është i lirë çdo kush ti bëjë, por nuk është çështje e policisë. Policia nuk ka një shkop magjik që t’i zbardhë menjëherë, aq më tepër me një personazh kaq të komplikuar të botës së krimit. Historia botërore është e mbushur me këto figura, ku organet nuk kanë ende informacion. Të garantoj që policia ka një vëmendje të posaçme dhe merret çdo ditë me këtë çështje”, deklaroi Çuçi.
Por ministri harroi se shefi i tij Edi Rama, i la vetëm 100 ditë afat drejtorit të policisë Muhamet Rrumbullaku (kur mori detyrën) për të çuar të shumëkërkuarin e drejtësisë pas hekurave ose zbuluar nëse është vrarë apo është gjallë.
Ky afat ka përfunduar që në fillim të muajit dhjetor dhe mesa duket pavarësisht disa kontrolleve në vilat e bazat e Martinajt në Fushë-Kuqe dhe Surrel, shteti shqiptar nuk pritet të ketë një përgjigje në një kohë të afërt për fatin e tij.
