Prokuroria e Elbasanit ka mbyllur hetimet për 37-vjeçarin Ramiz Mici, i cili qëlloi për vdekje me thikë gruan me të cilën bashkëjtonte, Jetlira Elezin, në të njëjtën moshë në muajin korrik të vitit të kaluar.
Prokuroria njofton se ka depozituar në gjykatë kërkesën për gjykimin procedimit penal. Sipas hetimeve, Mici e ka qëlluar Elezin me thikë në pjesën e kraharorit.
Mici, është akuzuar për veprën penale “Vrasje për shkak të marëdhënieve familjare” parashikuar nga neni 79/c i K.Penal. Aktualisht ky i pandehur ndodhet nën masën e sigurimit “Arrest në burg”.
Ngjarja e rëndë ndodhi pak pas mesnatës së 30 korrikut 2022. Të dy bashkëjetuesit kishin qenë të martuar më herët dhe kishin fëmijë nga këto martesa.
Bashkë me çiftin jetonte edhe vajza e viktimës, e cila ishte larguar pak ditë para ngjarjes pranë të atit. Ndërsa fëmijët e autorit jetonin me të ëmën e tyre.
Nga njoftimi zyrtar i policisë duket se shkaku i konfliktit mes Ramiz Micit dhe Jetlura Elezit ishte xhelozia, ndërsa Mici i ka thyer pak ditë më parë bashkëjetueses së tij edhe telefonin celular.
Viktima, sipas policisë nuk kishte pranuar të bënte kallëzim në polici për dhunë në familje, por kishte kërkuar urdhër mbrojtjeje.
