Enkelejd Alibeaj ka njoftuar këtë të martë pezullimin e katër deputetëve nga Partia Demokratike, ekzaktësisht Tritan Shehun, Oerd Bylykbashin, Belind Këllicin dhe Agron Shehajn. Të katërt janë pozicionuar krah kryetarit të Partisë Demokratike, Sali Berisha.
Për këtë ka reaguar dhe deputeti Ervin Salianji i cili ka bërë thirrje për bashkimin e demokratëve.
Salianji përmes një postimi në rrjetet sociale dënon lëvizjet e Alibeajt.
“Duhet bërë gjithçka për bashkimin dhe dhënien forcë demokratëve! Nuk ka përjashtime, sepse s’ka vendime të grupit parlamentar as mbledhje të tij! Kam keqardhje kur lexoj deklarata personale dhe në dëshpërim të cilat nuk i bëjnë mirē askujt. Sakrificat e demokratëve kërkojnë bashkim jo ndarje! Shqipëria meriton opozitë reale dhe dinjitoze, fati politik i çdokujt varet nga votat jo nga mllefet personale!
Partia Demokratike nuk është pronë e askujt, dhe inatet e vogla nuk bëhen dot vendime! Grupi Parlamentar do të reagojë me përgjegjshmëri dhe perpjekja për bashkim, do duhet te shihet me shumë respekt për ata qe e bëjnë realitet në interes të vendit dhe demokratëve. Kjo do te ndodhë! Vetëm kjo rrugë e bën fituese Partine Demokratike!”, shprehet Salianji.
