Partizani ka një organikë mjaft të pasur me lojtarë cilësorë dhe kjo i shtyn drejtuesit të mos përfshihen shumë në merkato, por ta studiojnë tregun nga larg, për të parë nëse mund të firmosin me ndonjë lojtar të afirmuar në Superiore. Por qartësisht mund të themi se “çmenduritë” si Kaçe, Çani apo Ferhan Hasani nuk do të përsëriten më.
Drejtuesit synojnë ta kthejnë klubin në një biznes, që fiton para dhe del me bilance pozitive dhe jo në një “oaz”, ku lojtarë që mbyllin karrierën, të mund të sigurojnë kontratën e fundit të pasur. Gjithçka ka nisur që nga kjo verë, kur vëmendja tek akademia është kthyer në pikën kryesore të strategjisë së klubit.
Drejtuesit e kuq, para se të kërkojnë për lojtarë të gatshëm, që kërkojnë paga të majme, po synojnë të peshkojnë futbollistë të rinj, duke ua marrë ekipeve të tjera, që i kanë në akademitë e tyre. Një shembull i kësaj strategjie është firma me Amarildo Karajn, të cilin ia morën në njëfarë mënyre Tiranës.
E njëjta gjë, megjithëse nuk bëhet mediatikisht, ka ndodhur thuajse në çdo grupmoshë, ku Partizani po bën maksimumin për të grumbulluar talentet më të mira të vendit dhe për të synuar më pas rritjen dhe integrimin e tyre në ekipin e parë. Buxhelaj është një prej shembujve të suksesit, por edhe Rrapaj, të cilin arritën ta marrin nga Skënderbeu dhe tashmë kanë shansin të nxjerrin një shifër të konsiderueshme nga shitja e tij.
/Panorama Sport/
