Detaje të reja kanë dalë nga ngjarja e ndodhur këtë të premte në qytetin e Bajram Currit, ku një person ka mbetur i plagosur me armë zjarri. Sipas informacioneve paraprake, mësohet se ngjarja ka ndodhur në mënyrë aksidentale ku një grup miqsh kanë qenë duke konsumuar alkool dhe festuar në një lokal.
Në një moment, një prej tyre ka shkrepur armën aksidentalisht, duke plagosur një prej tyre në këmbë. 61-vjeçari i plagosur, Din Qeleposhi është dërguar në spitalin e Gjakovës ku po merr mjekimet e nevojshme dhe ndodhet jashtë rrezikut për jetën.
Në vendin e ngjarjes kanë shkuar efektivët e policisë, të cilët kanë sekuestruar kamerat e sigurisë në lokalin ku ndodhi ngjarja. Ndërkohë, grupi i personave që ndodhej në lokal është shoqëruar në Policinë e Tropojës.
“Në qytetin e Bajram Currit, në rrethana ende të paqarta, është dëmtuar në këmbë shtetasi D.Q., 61 vjeç, banues në fshatin Sopot, i cili ka shkuar për ndihmë mjekësore në spitalin e Gjakovës, dhe ndodhet jashtë rrezikut për jetën. Grupi hetimor nën drejtimin e Prokurorisë vijon punën për zbardhjen e plotë të rrethanave të ngjarjes”, njoftoi policia.
