Një 24 vjeçar është arrestuar nga policia këtë të enjte, në kuadër të operacionit policor të koduar “Fati i lojërave”.
Ky shtetas vinte baste sportive, me aparat celular në Tiranë.
“Shërbimet e Komisariatit të Policisë Nr. 1, në vijim të punës për goditjen e paligjshmërisë në fushën e lojërave të fatit, në kuadër të operacionit të koduar “Fati i lojërave”, kanë organizuar kontrolle në lokale dhe në ambiente të ndryshme, të cilat mund të vihen në dispozicion për organizimin e lotarive të palejuara. Si rezultat i kontrolleve është evidentuar dhe goditur 1 rast i kësaj veprimtarie.
Në vijim të veprimeve u arrestua në flagrancë shtetasi: J. K., 24 vjeç, banues në Tiranë, pasi u kap në një lokal në rrugën “Tre vëllezërit Kondi”, duke vënë baste sportive, nëpërmjet aparatit cellular”, njofton policia.
Në cilësinë e provës materiale u sekuestrua aparati celular.
Materialet procedurale i kaluan Prokurorisë, për veprime të mëtejshme.
