Grupi i hakerëve “Anonymous” ka hakeruar webfaqen e Ushtrisë serbe.
Në një postim në Twitter, Anonymous i ka dërguar një mesazh presidentit serb, Aleksandar Vuçiç, duke e quajtur fashist dhe ushtrinë e tij si qenë që nuk mund të lehin më. Hakeret e paralajmërojnë Vuçiç dhe ushtrinë e tij se do iu vendosin zinxhirë.
“Web-faqja e Ushtrisë serbe është thyer. Fashisti Aleksandar, mos e humb kohën me qentë e tu. Ushtria juaj nuk mund të leh tani. Mos e nënvlerësoni as Anonymous, ne do t’ju vendosim zinxhirin”, thuhet në mesazhin e tyre.
Në një tjetër postim, të cilin e ka shoqëruar me flamurin shqiptar, Anonymous shkruan: “#Anonymous ka lançuar #OpSerbia Duke marrë uebsajte të shumta qeveritare ditët e fundit. Synimi është infrastruktura qeveritare. Presidenti serb Aleksandar Vuçiç dëshiron një luftë, atëherë një luftë po vjen në rrugën e tij”.
Mesazhi vjen pak ditë pasi nisi një konflikt online midis këtij grupi dhe Vuçiçit pasi Anonymous i bëri thirrje presidentit serb të ndalojë aktivitetet e tij të rrezikshme në Kosovë.
