Dëmtimi më i fundit i Reece James ka alarmuar jo pak tifozët e Chelseat por edhe stafin e skuadrës së bluve të Londrës. Duke marrë shkas nga situata alarmante për shkak të problemeve të shumta fizike të lojtarëve, tifozët kanë bërë një kërkesë të veçantë që në klub të rikthehet mjekja, Eva Carneiro e cila u bë e famshme për shkak të përplasjes me ish-trajnerin Jose Mourinho.
Mbështetësit e skuadrës londineze kanë mësyrë në rrjetet sociale të ish-mjekes duke i kërkuar me ngulm që ajo të rikthehet në “Stamford Bridge”. Reece James që u rikthye pas një dëmtimi të rëndë që e detyroi të mos ishte i pranishëm as në botëror, nuk arriti të rikthehej në lojë pas një tjetër dëmtimi në sfidën kundër Bournemouth.
Ai i bashkohet në infermieri edhe N’Golo Kante, Ben Chilwell, Ruben Loftus-Cheek, Armando Brojës, Wesley Fofana dhe Carney Chukwuemeka. Eva Carneiro ka punuar me Andre Villas-Boas, Roberto Di Matteo, Rafael Benitez dhe Jose Mourinho ndërsa ishte ky i fundit që në vitin 2015 e kritikoi publikisht për vonesën në ndërhyrjen e një rasti dëmtimi në fushën e lojës, duke shkaktuar edhe largimin e saj nga klubi.
