Kompania e fluturimit “Air Albania” me anë të një postimi në rrjetet sociale ka reaguar për herë të parë për tragjedinë që ndodhi në fluturimin e 21 dhjetorit nga Tirana në Londër, ku një anëtare e ekuipazhit ndërroi jetë sapo avioni u ul në pistën e aeroportit të “Stansted”.
Stjuardesa 24-vjeçare Greta Dyrmishi humbi ndjenjat dhe më pas ndërroi jetë.
Pavarësisht se shërbimet e ambulancës kryen transportin në kohë rekord të vajzës në spitalin “Princess Alexandra” në Harlow, ajo nuk mund t’i mbijetojë një ataku kardiak sipas kompanisë “Air Albania”.
Ndërkohë për ngjarjen në fjalë, një zëdhënës i policisë së Essex tha për mediat angleze: “Ne i erdhëm në ndihmë kolegëve tanë në Manchester Airports Group dhe shërbimin e ambulancës në Aeroportin Stansted pasi u thirrëm për një shqetësim për për shëndetin e dikujt”.
REAGIMI I “AIR ALBANIA”:
Më 21 Dhjetor, pasi zbritëm të gjithë udhëtarët e fluturimit drejt Londrës, një nga anëtarët e ekipit të kabinës, Greta Dyrmishi pësoi atak kardiak.
Edhe pas të gjithë asistencës mjekësore të ofruar në moment, ne përsëri e humbëm.
Air Albania ka kontaktuar familjen e saj që në momentet e para dhe vazhdojmë të jemi pranë tyre në këto momente të vështira.
Në respekt të Gretës dhe familjes së saj ne vendosëm ta ndajmë lajmin me publikun në momentin më të përshtatshëm.
Ne do ta kujtojmë gjithmonë Gretën si një profesioniste të pasionuar, një bashkëpunëtore të shkëlqyer dhe mikeshë shumë të mirë të të gjithëve ne.
Me besimin se ajo sot gjendet mes mëshirës së Zotit, Air Albania do të vazhdojë t’i qëndrojë pranë familjes.
View this post on Instagram
