Skandali korruptiv “Katar-Gate” ka marrë edhe më tepër kuptim ditën e sotme pas publikimit nga La Repubblica të disa fotove që tregojnë “kokën” e skemës së përfitimit të miliona eurove përmes OJF-ve nga shtetit i Gjirit Persik, ish-eurodeputetin italian Antonio Panzeri duke marrë valixhet me para.
Fotot janë shkrepur në një takim mes Panzerit dhe bashkëshortit të euro deputetes greke Eva Kaili, Francesco Giorgi me ministrin e punës të Katarit Ali Ben Samih al Marri në tetor, në hotelin Steigenberger në Bruksel.
Ato tregojnë Giorgi dhe Panzeri, dy nga lojtarët kryesorë në skandalin e shumëpërfolur të Katar-Gate , me çanta dhe valixhe me para duke dalë nga hoteli luksoz në Belgjikë.
Sipas publikimit, prokurori në Bruksel i kushton rëndësi të veçantë këtij takimi, i cili është një shembull se si është “tregtuar” ryshfet , ku pjesë e dosjes janë fotografitë dhe videot nga sistemi i sigurisë së hotelit.
“Është data 10 tetor. Kanë mbetur edhe pesë javë deri në fillimin e Botërorit. Skena zhvillohet në një nga hotelet më luksoze të kryeqytetit belg. Steigenberger Wiltcher’s, dikur pjesë e zinxhirit Conrad, ishte zgjedhja e vendosur e Silvio Berlusconit kur ai vizitoi qytetin si kryeministër për të marrë pjesë në samitet evropiane. Ndodhet në një nga zonat më elegante të Brukselit dhe mund të kuptohet lehtësisht pse e zgjodhën përfaqësuesit e emiratit të pasur”, thekson në artikull për të shpjeguar “klimën” e takimit.
Më tej në shkrimin e La Republiça thuhet: “Ora është rreth 5.30 pasdite. Mbërrijnë tre “Mercedes” të zinj dhe parkojnë para hotelit. Të tre janë të regjistruar në misionin diplomatik të Katarit. Nga makinat zbresin përfaqësues të qeverisë së Dohas me në krye ministrin e Punës. Ministri shoqërohet nga pesë burra të tjerë dhe njëri prej tyre mban një valixhe, që ndoshta nuk është për t’u habitur”.
Më 10 tetor, Antonio Panzeri mbërrin në Steigenberger Wiltcher’s me një çantë në dukje bosh që prokurorët thonë se do të mbushej plot kur është larguar nga hoteli.
Ministri i Punës i Katarit hyn në hotel dhe përcillet deri në katin e 4-të, ku ndodhet suita e tij. Pak më vonë mbërrijnë atje Panzeri dhe Giorgi. Fotot nga sistemi i sigurisë së hotelit tregojnë ish-eurodeputetin me çantën në dorë.
“Ish-asistenti i tij Giorgi ndërkohë shfaqet me vajzën e tij 20 muajshe në një karrocë. Nëna e saj është Eva Kaili, e cila në atë kohë ishte ende nënkryetare e Parlamentit Evropian”, nënvizohet më tej.
Dy burra nga delegacioni i Katarit i përshëndesin dhe i përcjellin në katin e katërt. Në korridorin që të çon në suitën e Al Marrit, një burrë tjetër nga Doha shfaqet, duke ndjekur Panzerin dhe tërheq zvarrë një valixhe tjetër me rrota.
Gjithçka ndodh rreth orës gjashtë. Pothuajse gjysmë ore më vonë, Giorgi largohet nga dhoma. Zbret disa kate, e lë vajzën me dikë, pastaj kthehet menjëherë në katin e 4-të.
“Ndoshta ka menduar se takimi po hynte në fazën më kritike”, shkruan Repubblica.
Një orë më vonë, takimi përfundon. Panzeri largohet nga hoteli duke mbajtur të njëjtën çantë me të cilën erdhi. Prokuroria ka shënuar me rreth të kuq çantën.
“Pse? Sepse duket më e plotë”, shkruhet në raportin përkatës.
Me pak fjalë, dyshimi i organeve të drejtësisë ishte se takimi në fjalë ishte një nga dërgesat e organizuara të parave, me kalimin e tyre duke u bërë kështu, nga një valixhe me rrota në një çantë.
