Autoriteti Konkurrencës ka gjobitur 4 kompani të miellit në treg. Lidhur me këtë eksperti i ekonomisë, Pano Soko në ‘MCN Economy’ deklaroi se me fillimin e luftës në Ukrainë ishte një tendencë për të abuzuar me rritjen e çmimeve në shumë fusha.
Ai tha se masa e gjobës ndaj kompanive është e papërfillshme duke u nisur dhe nga fitimet që ata kanë siguruar gjatë kësaj periudhe me abuzimin e çmimit. Sipas Sokos, qëllimi është që gjobat e tilla të jenë parandaluese.
“Kjo ishte një ngjarje e paralajmëruar dhe në momentin që plasi kriza në Ukrainë këtu pati menjëherë rritje të madhe çmimeve madhe dhe abuzim në shumë frontem, kryesisht shporta një ndër to. I gjithë ky reagim tani i vonshëm nuk është në përmasa që vërtet kërkon ti dëmtojë kompanitë, masa e gjobës është e papërfillshme. Mekanizmi që ndëshkon duhet ti vendosë kompanitë në pozita të tilla që të mos e mendojnë ta bëjnë këtë gjë, pra që përmes forcës së ligjit të mos i shkojë mendja më ta bëjnë, por kur këta vendosin një çmim në marrëveshje me njeri tjetrin përfitimet që kanë marrë i kanë superuar disa herë ndëshkimet e gjobës”.
Më tej ai shton se mënyra se si duhet të ndërhyjë është që ajo jo vetëm të ndëshkojë, por dhe të parandalojë, sepse ajo që kemi sot është që konsumatori final vuan pasojat e sjelljes së kompanive.
“Problemi është se sot që flasim ngjarja ka ndodhur 6 muaj më parë. Ndërkohë që qytetarët kanë paguar koston. Pra problemi është pse u lejua të ndodhte kjo, ose sot që gjete fajtorët pse nuk ndëshkohen këta sepse gjobat duhet të kenë funksion parandalues. Mënyra se si parandalohet kjo gjë është shumë vonë. Mënyra se si kemi reaguar këtë herë do ketë dhe raste të tjera, qëllimi është ta parandalojmë sepse kur kujtohemi si kofini pas të vjelave nuk është zgjidhje”.
Ndërsa lidhur me situatën monopol dhe kontrollin në tregje, Soko tha se institucionet rregullatorë në fokus kanë mbrojtjen e konsumatorit. Sipas tij, korrupsioni mbetet problemi më i madh që kemi dhe pikërisht ai bëhet dhe shkaku që konsumatori gjendet i pambrojtur.
“Kapitalizmi në vetvete është rendi që në gjendje të lirë tenton të shkojë drejt monopolit sepse më i forti fiton. Është një ngjarje që ndodh natyrshëm në një treg të lirë, më i forti fiton ndaj konkurrentëve të vet. Për këtë arsye dhe ndërtojmë institucionet rregullatorë. Ne duke qenë një shtet në ndërtim e sipër me institucione jo të forta që për dreq na duhen më shumë se 30 vjet për tu ndërtuar dhe duke pasur këtë mendësinë e vjetër të korrupsionit, ne jemi një shtet që e ka bazuar punën te korrupsioni. Ajo pengohet nga korrupsioni që është dominant dhe pikërisht korrupsioni ka penguar ngritjen dhe funksionimin normal të institucioneve”.
