Një arsenal armësh është gjetur nga policia gjatë kontrolleve të ushtruara në banesën e të shumëkërkuarit Ervis Martinaj në zonën e Fushë-Kuqes.
Në njoftimin zyrtar për mediat, policia bëri me dije se nga kontrollet e ushtruara gjeti dhe sekuestroi dy armë zjarri automatike, 1 silenciator, 7 mijë fishekë luftarakë, 85 predha eksplozive dhe 1 thikë bajonetë. Gjithashtu janë gjetur edhe disa materiale dhe veshje policie si uniforma, 7 jelekë multifunksionalë, 11 kapele policie, 2 radiomarrëse dhe fenelina policie.
Sipas njoftimit të shpërndarë për mediat, të gjitha këto municione dhe materiale ishin të fshehura në një koshere bletësh.
Njoftimi i plotë nga Policia e Shtetit:
“Kontrolle të befasishme në 3 banesa dhe në disa ambiente, në Fushë Kuqe.
Kontrollet, në kuadër të hetimeve në funksion të dy procedimeve penale “Plumbi i artë” dhe “Rrëmbim personi”.
Kontrollet, të mbështetura nga Forcat e Lëvizshme Operacionale të Policisë së Shtetit, FNSH dhe RENEA.
Sekuestrohen 2 armë zjarri, 1 silenciator, mijëra municione luftarake, radio, fenelina, uniforma policie, maska dhe sende të tjera të kundërligjshme.
Mëngjesin e sotëm, shërbimet e Policisë Gjyqësore të Drejtorisë së Përgjithshme të Policisë së Shtetit dhe ekspertë të Institutit të Policisë Shkencore, në bashkëpunim me shërbimet e Policisë Gjyqësore të Drejtorisë Vendore të Policisë Lezhë, mbi bazën e vendimit të Gjykatës së Posaçme të Shkallës së Parë për Korrupsionin dhe Krimin e Organizuar, në kuadër të procedimit penal të vitit 2022, regjistruar në SPAK, për vepra të rënda penale të kryera në formën e grupit të strukturuar kriminal, ushtruan kontroll në banesat e shtetasve: E. M., F. M. dhe R. M.
Gjatë kontrollit, shërbimet e Policisë gjetën të fshehura në koshere bletësh dhe sekuestruan në cilësinë e provave materiale, sendet e mëposhtme:
• 2 armë zjarri automatike, 1 silenciator, rreth 7 mijë fishekë luftarakë të kalibrave të ndryshëm, për armë të lehta dhe të rënda, 85 predha eksplozive, 1 thikë bajonetë, 9 uniforma policie, 7 jelekë multifunksionalë, 11 kapele policie, 2 radio policie, fenelina policie, maskë gome për fytyrën dhe dokumente të ndryshme. Gjatë kontrollit nuk janë gjetur vlera monetare.
Provat materiale do të dërgohen në Institutin e Policisë Shkencore, për ekzaminime të mëtejshme laboratorike”, thuhet në njoftim.
Pamjet nga aksioni i policisë:
- Çfarë ndodhi sot në banesën e Vis Martinajt?
Që prej orëve të para të mëngjesit forca të shumta policie janë duke ushtruar kontrolle në banesën e të shumëkërkuarit të drejtësisë Ervis Martinaj, i cili rezulton i zhdukur që prej muajit gusht të këtij viti.
RENEA, FNSH dhe policia e Lezhës kanë rrethuar të gjithë fshatin Fushë-Kuqe në Kurbin, ndërsa sipas informacioneve kontrollet u zhvilluan në kuadër të hetimeve për zhdukjen e 41-vjeçarit dhe operacionit “Plumbi i Artë”.
Ajo çka bie në sy është se vila e “Mbretit” të lojërave të fatit dhe hapësira prej qindra metra tokë është rrethuar nga një mur i lartë, i përforcuar gjithashtu me hekura me gjemba, si në rrethimet e burgjeve.
Martinaj gjithashtu ka zgjedhur edhe kamera me rezolucion të lartë, ndërsa një portë gjigande është vendosur në hyrje.
Vis Martinaj është shpallur në kërkim pas arrestimit të Nuredin Dumanit i cili dëshmoi se 41-vjeçari do ta paguante 500 mijë euro për të vrarë një nga krerët e Bandës së Durrësit, Endrit Doklen.
