Një ngjarje është shënuar këtë të Premte në Dibër ku një 57-vjeçarë me anë të një motosharre ka prerë 6 shtylla druri të vendosura nga OSHEE-ja.
Autori i dyshuar është shtetasi Dyleman Kaci, 57 vjeç, banues në fshatin Borie-Lurë, i cili ka prerë shtyllat me pretendimin se janë vendosur në tokën e tij.
“Shërbimet e Komisariatit të Policisë Dibër pas marrjes së njoftimit se një shtetas kishte dëmtuar (prerë), disa shtylla druri të vendosura nga punonjës të OSHEE-së, për të furnizuar fshatin Borie-Lurë me energji elektrike, kanë organizuar punën për zbardhjen e ngjarjes dhe identifikimin e autorit. Pas hetimeve ka rezultuar se autori i dyshuar është shtetasi D.K., 57 vjeç, banues në fshatin Borie-Lurë, i arrestuar në flagrancë, i cili ka prerë shtyllat me pretendimin se janë vendosur në tokën e tij.Po në vijim të verifikimit të pronës ku ishin vendosur shtyllat ka rezultuar se është pronë shtet e njësisë Administrative Lurë, Bashkia Dibër”, njofton policia.
Materialet procedurale i kaluan Prokurorisë Dibër për veprat penale “Shkatërrim prone me dashje”, “Vetëgjyqësi”.
