Viti akademik 2022-2023 për universitetet nisi me 6873 karrige studentësh të mbetura bosh në auditore dhe me 12 prej IAL-ve publike që panë dhjetëra degë mësimore të mbyllura, ku përfshihet edhe drama e degëve si Kimia e Fizika në Fakultetin e Shkencave me vetëm 4-5 studentë të regjistruar.
Shkak për këtë është bërë emigrimi i të rinjve dhe më të prekurat duket se janë degët e mësuesisë, dhe problematika e krijuar ka vënë në lëvizje qeverinë.
Kryeministri Edi Rama nisur nga situate e krijuar, ka njoftuar sot se studentët që do ndjekin studimet për mësuesi do përfitojnë paga të përmuajshme në nivelin e rrogës minimale.
Teksa ishte i pranishëm në ceremoninë “Mësuesi i Vitit”, Rama ka përgëzuar mësuesit për punën e tyre dhe tha se paga për mësuesin dhe disa kategori të tjera do të rritet.
“Shkollën e mësuesisë e kemi kthyer në një program kombëtar, studentët që futen në shkollën e mësuesisë marrin dhe pagën e përmuajshme deri në përfundim të shkollës. Se pas shkollës marrin përsipër diçka që është gjëja më e shtrenjtë, siç janë fëmijët. Do ti rrisim përsëri pagat për mësuesit, për punonjësit psikosocial dhe ata të sigurisë. Kemi arritur në 11 mld e 380 mln për të mbështetur lëvizjen e mësuesve. Sot kemi 1650 mësues ndihmës, ndërkohë që e kemi nisur me 0. Sot kemi 500 shkolla qendra komunitare, brenda së cilave janë ngritur 2500 klube, jo qoftesh, po klube artistike, vizatimi, teatri, mjedisi, ku marrin pjesë rreth 42 mijë nxënës. Në janar futemi në një fazë tjetër me disa programe të tjera”, tha Rama.
