Analisti Baton Haxhiu, i njohur si miku i afërt i kryeministrit Edi Rama, ka rrëfyer në Syri TV se shefi i qeverisë kishte dëshirë që të merrte nën kontroll SPAK-un.
Duke shpjeguar “betejën” e ashpër në distancë midis Kryeministrit dhe ambasadores amerikane Yuri Kim, analisti tha se pavarësia e Prokurorisë së Posaçme do t’ia bënte të vështira veprimet politike Ramës.
“Rama është prej njerëzve që më dëgjon por nuk debaton në tavolinë. Ai është prej atyre që nuk të jep përgjigje aty për aty. Kujdeset që mos t’i dalin sekretet. Ndër shqiptarët që jetojnë në Tiranë, e njoh më së miri. Institucioni i drejtësisë krejt i pavarur i bën të vështira veprimet politike. Një institucion i pavarur gjithashtu është balancues i demokracisë. Dëshira e Edi Ramës ka qenë që së paku t’i njohë njerëzit që janë në SPAK”, tha Haxhiu.
“Kishte betejë dhe betejën e fituan SHBA-të“, shtoi ai me tej.
“Dhe po ta shihni DASH nuk pati reagim, sepse betejën ia ka lënë ambasadores. Ata ia kanë ndërtuar ndihmën në të gjitha mënyrat, por betejën ia kanë lënë asaj. Reforma në Drejtësi nuk e ka bazën amerikane, por holandeze. Holanda duke patur Amerikën aleate, se Amerika ndërton konceptin e Reformës në Drejtësi, duke forcuar prokurorët dhe gjyqtarët, e njëjta gjë ka ndodhur edhe në disa vende të Ballkanit“, nenvizoi analisti.
