Në një takim me mjekë dhe ekspertë të Sistemit Shëndetësor në selinë blu, kryedmeokrati Sali Berisha ka bërë përgjegjëse qeverinë Rama për dështimin e sistemit në ofrimin e shërbimit cilësor te pacientët dhe largimin e studentëve drejt vendeve të BE-së.
“Edi Rama deklaronte se brenda këtij viti do kenë dyfishim të rrogave mjekët në krahasim me vitin 2013. Nuk deklaroi dot se do barazonte rrogat me mjekët në Kosovë. Kolegët në Kosovë marrin thuajse dyfishin e asaj që merrni këtu. Unë e kuptoj që vërtetë emigracioni është edhe i pashmangshëm për disa arsye. Por ata që duan të mbajnë një sistem shëndetësie, ata bëjnë gjithçka për të paguar, shpërblyer punonjësit e këtij sistemi. Është reale që nga Italia shkojnë në Gjermani, nga Hungaria e Çekia shkojnë në Gjermani. Për këtë shkak, Hungaria, rrogat e mjekëve i disafishoi. Duke lënë në këtë mënyrë një marzh shumë të vogël ndryshimi, vetëm e vetëm që t’i qëndronte sistemi në këmbë. Nëse duam ta mbajmë këtë sistem, ne sigurisht nuk mund ta mbajmë me emulacion. Ne do ta mbajmë me shpërblim dhe me kushte”, tha ai.
Duke iu referuar pagës së ulët si arsyeja kryesore që shtyn profesionistët e rinj të fushës së mjekësisë që të zgjedhin Gjermaninë si alternativë largimi, Berisha i kujtoi Ramës se 122 miliardë lekët e shpërdoruara kot në 9 muajt e parë të 2022 mund të ishin përdorur për dyfishim të fondit të pagave.
Kryetari i PD-së tha se kjo situatë do të vazhdojë e tillë kur ekziston një qeveri që e përdor buxhetin për të pasuruar veten dhe ministrat.
“Por kur përdor buxhetin për të pasuruar veten dhe minsitrat, kur firmos për 3 djegësa 420 mln dhe asnjë nuk është në punë, kur vepron gjithçka në kundërshtim me ligjin, duke i çelur derën grabitjes, atëherë nuk ngelet për rroga. KLSH-ja, konstaton se në 9 muajt e parë të këtij viti, u vodhën, u shpërdoruan 122 mld lekë. U vodhën dhe u shpërdoruan 30% më shumë se fondi i përgjithshëm i pagave. Me aq sa u vodhën dhe u shpërdoruan këto 9 mua, çdo rrogtar, çdo buxhetor mund të kishte marrë rrogë dyfish dhe do kishte tepruar 1/3. Nëse ndërton shkolla siç ndodh në Tiranë me 6 fishin e çmimit, kur shkolla ka standard me ndërtimin me 680 mijë euro. Kaq e ndërton PNUDIK. Këto ndërtime, bëhen nga materiale, këto materiale kanë manuale të cilat përcaktojnë koston dhe çmimin e tyre. Nuk ngelet gjë për qytetarët. Nuk mbetet gjë, mund të shtroni me të drejtë pyetjen, se si shpërëdorohen 122 mld lekë”, deklaroi Berisha.
