IMT ka zbarkuar orët e para të mëngjesit në rrugën “Myslym Keta” në kryeqytet, për të shembur pallatin e dëmtuar nga tërmeti.
Edhe pse disa prej banorëve janë shprehur kundër prishjes së pallatit të tyre, fadromat kanë nisur punën sot në mëngjes. IKMT dhe policia kanë zgjuar që pa gdhirë banorët dhe i kanë nxjerrë jashtë në mënyrë që të nisë me shembjen.
Prej ditësh banorëve u është ndërprerë energjia elektrike dhe uji.
Ata thonë se nuk ka vendim gjykate për prishjen e pallatit teksa, sipas tyre, shkalla e vlerësimit për këtë pallat pas tërmetit ka ndryshuar disa herë.
Një prej banorëve tha për gazetarët se nuk arritën të merrnin nga banesat as sendet personale.
“Unë kam nënshkruar vetë për DS3, jo për atë tjetrën, policët kanë ardhur që mbrëmë pa asnjë vendim bashkie a gjykate. E kam firmosur bonusin e qerasë, po ku të shkoj me 80 mijë lekë, qiratë janë më 350€. Ato kanë ardhur që mbrëmë në darkë, duke i nxjerr plaçkat si në kohën e Enverit kur i internonin njerëzit që ën 5 të mëngjesit”, u shpreh një banor.
“Kanë ngel rrobat e plaçkat brenda, janë komplet të gjitha. Kemi ngel mbrëmë jashtë. Në mbrojtjen Ukrainën dhe ja ku jemi, erdhi shteti u bë Rusi në pronat tona. Ai thotë nuk ke të drejtë për shpronësimin, këtu na dëmtoi shtetit, askush tjetër, në jemi 6 pjesëtarë, është djersa ime e 40 viteve”, shtoi një tjetër.
“Neve tërmeti nuk na bërë asgjë, por i duan tokat. Ca të bëjmë gjyqi ishte sot, dhe nuk priten dhe i shemben, a hahesh me shtetin. Bashkia na dha banesa sociale, e jo banesë më dokumente”, ishte reagimi i një tjetër banori.
Reagimet
Lidhur me aksionin e IMT reagoi dhe deputeti demokrat Belind Këlliçi, njëkohësisht kandidati i opozitës për zgjedhjet e ardhshme lokale.
“Për të prishur e shkatërruar, shteti zgjohet që pa gdhirë. Një batalion me qindra policë mbron paligjshmërinë e kryetarit të bashkisë. Nuk duronin dot sa të shprehej gjykata. Zdromsit i hanë duart për pare”, shkruan ai në një postim në rrjetet sociale.
Kreu i PD-së, Sali Berisha u shpreh se Edi Rama dhe Erion Veliaj janë një bandë çnjerëzore.
“Edi Rama dhe Erion Veliaj janë një bandë, që fitimi i ka çnjerëzuar gjerë në kockë! Duhej patjetër t’i dëshpëronin dhe mjeronin për festat e fundvitit 90 familje, 250 fëmijë, të moshuar, burra e gra. Akt i shëmtuar,” shkroi Berisha në një postim në rrjetet sociale.
“U sulmua me tërbim dhe aq rrëmbim edhe pallati tek rruga “Myslym Keta”, sa banditët nuk u lanë banorëve as të mblidhnin plaçkat tamam. Pallati tek “Myslym Keta” qëndroi në këmbë tri vjet pas tërmetit, por tani horrave të bashkisë me Veliajn në krye nuk u priste puna me asnjë orë dhe u vërsulën. Ashtu siç nuk i priste puna për Teatrin, që ka dy vjet i prishur, por u sulmua në mes të pandemisë nga vandalët dhe hajdutët e bashkisë e të policisë, se nuk iu priste hajdutëria. Ashtu siç u sulmua e mbytën me gaz, burra, gra, fëmijë e të moshuar në Astir. Ashtu siç u sulmuan, u dhunuan dhe u shkatërruan egërsisht tek Bregu i Lumit. Ashtu siç u sulmuan, u arrestuan banorët e të gjitha moshave kur shkatërruan banditet tek 5 Maji. Pra, qytetarë mos harroni sa herë që do të shikoni Veliajn në ndonjë lagje të Tiranës bëhuni gati dhe prisni shkatërrimin dhe dëbimin e radhës”, shkroi Vasili në FB.
