Teksa tensionet në veri të Kosovës po vijojnë prej disa ditësh, duket se edhe me apelin e ndërkombëtarëve, grupet kriminale serbe atje nuk pranojnë të heqin barrikadat e vendosura për të bllokuar rrugët.
Ditën e sotme një tjetër barrikadë është vendosur në Veri dhe Ministri i Brendshëm i Kosovës, Xhelal Svelça ka reaguar lidhur me situatën.
Përmes një interviste të dhënë më herët, Svelça është shprehur se institucionet e Kosovës i kanë të gjitha kapacitetet për largimin e barrikadave serbe nga rrugët dhe po vlerësojnë situatën.
Por nga ana tjetër, lidhur me këto deklarata, ka pasur një reagim nga Lista Srpska, duke e konsideruar pjesëmarrjen e Sveçlës në Bërnjak një provokim.
“Ai e di shumë mirë se nuk ka ardhur në komunat serbe në veri të Kosovës dhe as s’ka çfarë të kërkojë në rajonet tona. Theksojmë se populli serb është i përkushtuar për paqen në këto zona dhe deklaratat e Sveçlës se është i gatshëm të vazhdojë të përdorë dhunën dhe të heqë barrikadat me dhunë janë në favor të përkeqësimit të mëtejshëm të situatës. Ne do të bëjmë gjithçka që ta ruajmë paqen dhe popullin tonë nga sulmi nga Prishtina, por nëse njësitë e Kurtit tentojnë të përdorin dhunën për të hequr barrikadat, do të marrin përgjigjen e popullit serb që e meritojnë”, thuhet në deklaratën e Listës Srpska.
