Operacioni i koduar “Damage” që ka parë të dërgohen pas hekurave 7 persona në muajin Shtator, ka vijuar sot me arrestimin në aeroportin e Rinasit të një tjetër të shumëkërkuari.
Ditën e sotme ka përfunduar në pranga 60-vjeçari Mario Guadagnoli, me banim në Itali.
60-vjeçari, në bashkëpunim me 12 shtetas të tjerë dyshohet se përmes mashtrimit, kanë krijuar dhe menaxhuar subjekte tregtare fiktive, nëpërmjet të cilave kanë qarkulluar vlera të konsiderueshme parash, të padeklaruara në organet tatimore, duke i shkaktuar kështu shtetit shqiptar, një dëm financiar prej 3 milionë eurosh.
Njoftimi i policisë:
Vijon operacioni policor i koduar “Damage”, shkon në 8 numri i të arrestuarve.
Vihet në pranga një shtetas i shpallur në kërkim për veprën penale “Krijimi i skemave mashtruese me tatimin mbi vlerën e shtuar”.
Në shtator 2022, në kuadër të këtij operacioni, janë vënë në pranga 7 shtetas.
Specialistët e Seksionit për Hetimin e Krimeve Ekonomiko-Financiare, në bashkëpunim me Komisariatin e Policisë Rinas, kanë ndaluar shtetasin M. G., 60 vjeç, banues në Itali, i shpallur në kërkim në kuadër të operacionit policor të koduar “Damage”, për veprën penale “Krijimi i skemave mashtruese me tatimin mbi vlerën e shtuar”.
60-vjeçari, në bashkëpunim me 12 shtetas të tjerë (7 të vënë në pranga, 5 ende në kërkim) dyshohet se përmes mashtrimit, kanë krijuar dhe menaxhuar subjekte tregtare fiktive, nëpërmjet të cilave kanë qarkulluar vlera të konsiderueshme parash, të padeklaruara në organet tatimore, duke i shkaktuar kështu shtetit shqiptar, një dëm financiar prej 3 milionë eurosh.
