Tirana u trondit pasditen e djeshme nga një atentat me armë zjarri të ndodhur në rrugën “Fadil Bodinaku”, në zonën e njohur si Komuna e Parisit.
Viktimë mbeti 49-vjeçari Edmond Papa, i cili u qëllua me 9 plumba sapo kishte zbritur nga mjeti i tij luksoz tip “Mercdes Benz G-Class” dhe po konsumonte kafen në një lokal të zonës.
Papa humbi jetën teksa transportohej për te Spitali i Traumës, ndërsa autori i ngjarjes së rëndë mbetet ende i paidentifikuar, pasi ka përdorur maskë për t’iu fshehur kamerave të shumta të sigurisë që ndodhen në zonë.
Hetuesit kanë shoqëruar disa persona që ishin të pranishëm në vendin e ngjarjes dhe kanë sekuestruar pamjet e kamerave të sigurisë, jo vetëm të vendit të krimit, por edhe subjekteve pranë, për të bërë të mundur zbulimin e autorit.
Ndërkohë, sa i përket viktimmës, 49-vjeçari kishte dy mbiemra dhe njihej gjithashtu si Edmond Hoxha.
Ai është me origjinë nga Fieri, por banonte prej vitesh në Sarandë ku dhe zotëron disa biznese dhe prona, ku më i njohuri është hoteli “Blu Sky”.
Sakaq, detaje të reja janë zbuluar për ngjarjen, me hetuesit që janë të sigurt se autori ka qenë i mirë informuar për lëvizjet e 49-vjeçarit dhe për më tepër e ka mbajtur nën vëzhgim kur ka mbërritur në Tiranë.
Kamerat e sigurisë të zonës dhe jashtë lokalit ku ndodhi vrasja kanë fiksuar momentet kur autori ka qëndruar për disa minuta në këmbë pranë pallatit ku banonte vëllai i biznesmenit.
Pak minuta pasi Edmond Papa u ul në lokal, autori u fut i vetëm dhe e qëlloi me 9 plumba pistolete të llojit “Glock”, e më pas u largua sërisht i vetëm në këmbë nëpër rrugicat e zonës.
Ndërkohë, Edmond Papa kishte ardhur mesditën e të premtes në kryeqytet së bashku me nënën e tij, për ta vizituar atë këtë të shtunë tek mjeku, pasi ishte e sëmurë.
Policia dyshon se vrasja ka ndodhur për larje hesapesh. Mësohet se 49-vjeçari kishte precedent në fushën e narkotikëve dhe se më parë ka qenë i dënuar në Greqi për drogë.
