Një nga drejtuesit e platformës ndërkombëtare “Everfx”, e cila ka mashtruar qindra mijëra njerëz në mbarë botën duke përftuar përmes kësaj skeme 2.4 miliardë euro me kriptovaluta, është arrestuar sot në aeroportin e Barcelonës.
Kreu i grupit në Spanjë, njëherësh ortaku i të shpallurit në kërkim ndërkombëtar Amant Josifi është arrestuar sapo ka shkelur në territorin katalanas, pasi ka fluturuar drejt Barcelonës me një avion të nisur nga Rumania.
Në aeroport, agjentët e Mossos d’Esquadra dhe Garda Civile ishin duke e pritur bosin e Call Centera-ve, i cili sipas hetuesve është lideri i rrjetit në Spanjë.
I arrestuari ishte “përgjegjës për menaxhimin e të gjitha viktimave spanjolle” përmes agjentëve të komisionit që i ridrejtuan në platformën “Everfx”, megjithëse kontaktet u bënë përmes call cantera-ve në të cilat agjentët (e rremë financiarë) i mashtruan përmes një sistemi kompleks të inxhinierisë.
Arrestimi i tij lidhet me operacionin e zhvilluar më 8 dhe 9 nëntor nga policia e Gjermanisë, Suedisë, Finlandës, Letonisë, Ukrainës, Gjeorgjisë, Shqipërisë dhe Spanjës nën koordinimin e Eurojust, ku përfshihej çmontimi i një organizate kriminale që operonte në disa shtete.
Organizata ka operuar përmes call centera-ve nga vende kryesisht të vendosura në Shqipëri, Ukrainë, Gjeorgji, Kosovë dhe Maqedoninë e Veriut, duke kryer operacione mashtruese që sollën miliona fitime.
Nga ky operacion u goditën 15 call center, si dhe u arrestuan në vendin tonë dy drejtuesit kryesorë të organizatës.
Sipas hetuesve rrjeti i call centera-ve fitonte deri në 400 euro në minutë duke kryer aktivitete mashtruese dhe arrinte fitime prej 50 milionë eurosh në tre muaj.
Forcat e policisë spanjolle vazhdojnë të gjurmojnë 476 platformat mashtruese të lidhura me organizatën kriminale në mënyrë që të prekurit të jenë në dijeni të këtyre fakteve dhe të paraqesin ankesat e duhura.
