Gjykata e Posaçme kundër Krimit dhe Korrupsionit ka dënuar gjyqtaren e Durrësit Mimoza Margjeka me 4 vite e 6 muaj burg, pasi akuzohej për veprën penale të korrupsionit.
Gjyqtarja Margjeka u arrestua nga Policia e Shtetit në bashkëpunim me SPAK në shtatorin e vitit 2020.
Margjeka akuzohej nga Prokuroria e Posaçme se kishte përftuar 6000 euro rryshfet në këmbim të nxjerrjes nga qelia të Orion Balit. Vendimi i saj ishte ndryshimi i masës së sigurisë për Balin nga “arrest në burg” në “garanci pasurore”, teksa ky i fundit ishte pas hekurave pasi ishte ndalur për trafik klandestinësh.
Së bashku me Margjekën, SPAK mori nën hetim edhe bashkëshortin e gjyqtares, Arben Cara, avokatin e Balit, Skënder Demiraj, vëllanë e të pandehurit Nejton Balin dhe Klaudjo Zhillën.
Sa i përket të arrestuarve të tjerë, GJKKO ka vendosur të dënojë me 4 vite burg Arben Carën, 3 vite shërbim prove avokatin Demiraj dhe me 3 vite burg Klaudio Zhillën.
Por, vetë gjyqtarja nuk do të kalojë asnjë ditë pas hekurave pasi dënimi i saj konvertohet në shlyerjen për 3 vite rresht shërbim prove.
Në dalje të GJKKO, Margjeka ka shpërthyer në akuza përkundrejt sistemit duke thënë se vendimi është marrë me regji, duke drejtuar gishtin nga kryeministri Edi Rama.
“Krimi është lart, e bëjnë vetë. Krimin po e bën pushteti, këto janë vegla. Nuk isha anëtare, isha gjyqtare e vetme. Unë nuk kam nevojë të marr sinjale. Juridikisht vendimi që thashë me datën 17 korrik e dha gjyqtari tjetër më 19 korrik me kërkesën e kryetarit të PS dhe ajo erdhi e fshehtë. Përse nuk e kërkoni dosjen. Të shqetësosh lartmadhërinë nuk paska lidhje? Po u shqetësua më i madhi, këta të tjerët janë miza me i shtyp me këmbë. Ju nuk po guxoni ta pyesni. Unë kam ik nga Durrësi nga krimi nga korrupsioni. Nuk i besoj më institucioneve. Unë jam gjyqtare, unë e di ligjin. Këta njerëz janë të porositur, mua më vjen keq për ta. Nuk e kam me pasion të bëj sot gjyqtaren. Më dënuan mua, nuk është fundi i botës, shyqyr që nuk është koha e Enverit se do t’i varnin”, u shpreh ajo.
Edhe pas seancave të mëhershme, Margjeka ka ngritur dyshime se akuzat ndaj saj kanë prapaskena politike.
Sipas saj, gjithçka lidhet me vendimin që gjyqtarja ka marrë për mandatin e kryetares së Bashkisë së Durrësit, Valbona Sako, të dalë nga votimet e 30 Qershorit.
Margjeka asokohe nuk pranoi të certifikonte mandatin duke argumentuar se, partia Bindja Demokratike ishte regjistruar përtej afateve ligjore dhe për pasojë fleta e votimit, ku ndodhej edhe kandidatja e Partisë Bindja Demokratike, ishte e pavlefshme.
