Policia e Shtetit ka zyrtarizuar disa ndryshime të rëndësishme në hierarkitë saj.
Emërimi më i bujshëm është ai i zëvendësdrejtorit të përgjithshëm Tonin Vocajt në postin e drejtorit të Policisë së Tiranës. Vocaj zëvendëson Lorenc Panganikën, i cili shkon në Akademinë e Sigurisë.
Deri në korrikun e vitit të kaluar, Vocaj mbante postin e drejtorit të policisë kriminale, ku u shkarkua nga kreu i atëhershëm i Policisë Gledis Nano.
Postin e zëvendësdrejtorit të përgjithshëm e merr Sokol Bizhga.
Po ashtu, ndryshime ka edhe në disa drejtori qarqesh.
Ermal Muça emërohet drejtor në Vlorë, Niko Brahimaj emërohet në Fier dhe Ervin Hodaj në Shkodër.
Lutfi Minxhozi emërohet drejtor për Marrëdhëniet Ndërkombëtare dhe Gent Ndoj emërohet drejtor i Krimit Ekonomik në Drejtorinë e Përgjithshme.
Ndryshimet pritet të prezantohen nesër nga drejtori i Përgjithshëm i Policisë, Muhamet Rrumbullaku dhe vijnë gati muaj pas emërimit te tij në krye të Policisë së Shtetit.
Njeriu i besuar i Tahirit në krye të Policisë së Shkodrës
Me lëvizjet e fundit, në krye të Policisë së Shkodrës emërohet një prej ish-drejtorëve të cilësuar si “më të besuarit” e ish-ministrit Saimir Tahiri.
Gjatë kohës kur në krye të Ministrisë së Brendshme ishte Tahiri, Hodaj ka mbajtur detyra të rëndësishme në Polici. Ai ka qenë në krye të Drejtorisë Vendore të Fierit, deri në 2015-ën, kur u emërua në krye të Policisë së Tiranës.
Këtë post e mbajti deri në vitin 2017, kur u zëvendësua nga Ardi Veliu si kryepolic i kryeqytetit, me ardhjen e Fatmir Xhafajt drejtues i Ministrisë së Brendshme.
Hodaj ka qenë një emër i lakuar në media dhe i akuzuar nga opozita.
Kur Hodaj garonte për të qenë në krye të BKH-së, ish-shefi i policisë Dritan Zagani do bënte një reagim publik në rrjetet sociale, ku do ta akuzonte Hodajn, si “ushtar” të Habilajve, kushërinjve të ish-ministrit Tahirit.
“Ky ish vegla e Saje Qorrit që quhet ERVIN HODAJ, ky vegël që unë e di mirë se kush është që përpara se ta kisha epror të drejtpërdrejtë në Fier, ky që si vegël e Sajes, në përdorim të mjeshtrave të intrigues Arben Skëndo e Zamir Shtylla, për kënaqësinë e shefit me beri kurban të Habileve kushërinj, ky mender drejetor që naten e shoqërimit të Audit të zi si vetë ai dhe sera e tijë, merrte në telefon e urdhëronte që të lirohen urgjent dhe të përcillen me nderime biznesmenet e famshëm Habilaj, kushurijn të dashur për shefin e madh”, do të shkruante Zagani në një postim në rrjetet sociale.
Po ashtu, një tjetër efektiv policie që ka denoncuar për lidhje të Policisë me krimin, Antonio Nazëraj, e ka akuzuar se ka favorizuar bandën kriminale të Habilajve.
Akuza ka pasur edhe nga opozita. Ish-kryeministri Sali Berisha e ka përmendur Hodajn si pjesë e drejtuesve të policisë që “kanabizoi Shqipërinë”.
Po ashtu, PD ka akuzuar se Hodaj, gjatë detyrës si drejtues i Policisë së Tiranës, ka qenë i implikuar në kultivimin e bimëve narkotike në shumë zona periferike të kryeqytetit.
