Qeveria britanike dhe kryeministri i ri Rishi Sunak duken se kanë gjetur formulën për një marrëveshje me Shqipërinë që do të ndalte fluksin e kalimit të emigrantëve në Kanal me gomone.
Sipas Telegraph.co.uk, do të jetë vetë Sunak ai që do të njoftojë formulën e qeverisë së tij për çështjen e emigrantëve ilegalë shqiptarë, teksa vendimi është arritur pas disa javësh negociata intensive me qeverinë shqiptare.
Ai pritet të propozojë që Shqipëria të vendoset në të njëjtin nivel me vendet “e sigurta” të BE-së dhe kjo do t’i hapte rrugën deportimeve të shpejta të emigrantëve nga vendi ynë, të cilët kërkojnë azil në Mbretërinë e Bashkuar.
Ministrat do të përpiqen të shmangin kritikat nga avokatët e të drejtave të njeriut duke argumentuar se masat janë në përputhje me vendet e tjera evropiane, të cilat e trajtojnë Shqipërinë si një vend të sigurt dhe në këtë mënyrë përjashtojnë shqiptarët nga e drejta për të kërkuar azil.
Downing Street po shqyrton gjithashtu propozimet për kthimin e shqiptarëve që pretendojnë se janë viktima të skllavërisë moderne në vendlindjen që aplikimet e tyre të përpunohen aty për të parandaluar që ata të shfrytëzojnë vonesat prej më shumë se një viti për të qëndruar në Britani.
Një rekord prej 3,432 shqiptarësh deklaruan se ishin viktima të trafikimit në nëntë muajt e parë të vitit, duke u bërë kombësia më e madhe që aplikon sipas aktit të skllavërisë moderne, duke kaluar edhe vetë britanikët.
Sunak e ka bërë të qartë se trajtimi i imigracionit të paligjshëm është një nga prioritetet e tij kryesore, së bashku me ekonominë, koston e jetesës dhe ngarkesën e NHS.
Kryeministri do gjithashtu të përcaktojë një strategji të re imigracioni përpara se deputetët konservatorë të shqetësuar të kthehen në zonat e tyre elektorale për Krishtlindje.
Ministrat janë përballur me një reagim të ashpër nga deputetët e “Murit të Kuq” të tërbuar ndaj hoteleve që po merren për numrin rekord të emigrantëve. Legjislacioni që miraton çdo ndryshim do të vijë në Vitin e Ri.
Sunak dhe kryeministri Edi Rama patën një komunikim përmes telefonit në fillim të këtij muaji, ku diskutuan se duhet të bënin më shumë për të trajtuar emigracionin ilegal dhe diskutuan “mbylljen e zbrazëtirave që po parandalojnë kthimin e shpejtë të azilkërkuesve që nuk u pranohen kërkesat“.
Rama ka sinjalizuar më parë mbështetjen e tij për Mbretërinë e Bashkuar, duke kërkuar që të “shtrëngojë sistemet e veta të emigracionit siç bëri Gjermania kur u përball me një fluks të emigrantëve shqiptarë”.
Ai ka këmbëngulur se Shqipëria është “e sigurt” si një anëtare e NATO-s që kërkon anëtarësimin në BE, por gjithashtu ka kërkuar garanci mbi viza pune për shqiptarët në Mbretërinë e Bashkuar.
“Shumë vende evropiane e trajtojnë Shqipërinë si automatikisht të sigurt, pavarësisht se janë të detyruara nga e njëjta konventë për refugjatët, GJEDNJ dhe traktatet moderne të skllavërisë që jemi ne. Nuk ka asnjë arsye pse ne të mos i kthejmë thjesht automatikisht dhe menjëherë të gjithë shqiptarët – është një vend padyshim i sigurt evropian. Efekti parandalues do të thotë se së shpejti ata do të ndalojnë kalimet në Kanal”, deklaroi një ish-ministër për Emigracionin.
Ndërkohë, ministri aktual i emigracionit Robert Jenrick parashikoi ndryshimet kur tha se Shqipëria ishte “prioriteti numër një i Ministrisë së Brendshme“.
Sakaq edhe kryeministri Rama ditën e djeshme gjatë prezantimit të projektit për Portin e ri Tregtar të Durrësit që do të ngrihet në “Porto Romano”, teksa ftoi kompanitë britanike që të bëhen pjesë e garës për ta ndërtuar këtë vepër, tha se për emigrantët që kalojnë Kanalin me gomone, homologu Rishi Sunak ka dëgjuar një propozim të vjetër të tij.
Ky propozim me shumë gjasë është ai që Rama e ka theksuar edhe në postimet e tij në Tëitter ku shigjetonte ministren e Brendshme britanike Suella Braverman për “retorikën kriminale” dhe i kërkonte Britanisë që të ndiqte shembullin e Gjermanisë dhe Francës, të cilat ndryshuan legjislacionin e tyre dhe shtrënguan rregullat për shqiptarët që kërkonin azil në vitet 2015-2017.
“Me kryeministrin e Britanisë së Madhe kemi pasur një bisedë shumë produktive dhe kemi rënë dakord që të krijojmë një skuadër të përbashkët më në fund, propozim i imi i vjetër, po u desh që të fitoja 3 mandate që të fillonin të më dëgjonin tamam këta partnerët ndërkombëtarë, në mënyrë që ta godasim pa mëshirë këtë pjesë…“, rrëfeu Rama dje.
Burimi: Telegraph.co.uk/ Përshtati: Boldnews.al
