Ambasadorja amerikane në Tiranë, Yuri Kim ka zhvilluar një takim me kryeministrin Edi Rama këtë të Hënë.
Lajmi konfirmohet nga vetë ambasada amerikane, që përmes një njoftimi për mediat cek edhe temat e diskutuara në takimin dypalësh.
Mes tyre, sipas njoftimit, është edhe reforma në drejtësi.
“… u diskutua për arritjet, por edhe sfidat në zbatimin e reformës në drejtësi në Shqipëri. Ata ranë dakord se është thelbësore që institucionet e drejtësisë në Shqipëri të jenë të pavarura dhe të patrembura në ekzekutimin e detyrave dhe përgjegjësive të tyre”, thotë ambasada amerikane.
Takimi vjen pas një njoftimi të paprecedentë nga Ministria e Jashtme shqiptare, që deklaronte se kishin nisur procedurat për largimin e ambasadores amerikane Yuri Kim nga Shqipëria. Kjo u cilësua gjegjësisht si një përplasje mes kryeministrit Edi Rama dhe ambasadores Yuri Kim lidhur me emrin që secili preferon për të pasuar Arben Krajën në krye të SPAK-ut.
Njoftimi i plotë
Në njoftimin e ambasadës thuhet:
Ambasadorja Kim u takua me kryeministrin Rama më 12 dhjetor për të rishikuar arritjet në marrëdhëniet SHBA-Shqipëri në vitin 2022 dhe për të diskutuar mënyrat për të vazhduar forcimin e bashkëpunimit tonë në demokraci, mbrojtje dhe biznes në vitin 2023.
Ambasadorja Kim shprehu vlerësimin e Shteteve të Bashkuara për lidershipin dhe kontributin e rëndësishëm të Shqipërisë gjatë vitit të parë në Këshillin e Sigurimit të Kombeve të Bashkuara. Roli i Shqipërisë në Këshillin e Sigurimit të OKB-së ka qenë kritik për çështje të rëndësishme globale, duke përfshirë mbështetjen e Ukrainës përballë pushtimit të Rusisë.
Ambasadorja Kim vlerësoi kontributet e Shqipërisë për integrimin dhe stabilitetin rajonal, duke përfshirë thirrjet e Shqipërisë për përmbajtje në veri të Kosovës. Shtetet e Bashkuara dhe Shqipëria kanë dënuar të gjitha sulmet ndaj agjencive të sigurisë kosovare dhe ndërkombëtare dhe kërcënimet me dhunë dhe frikësim, dhe kanë shprehur mbështetjen e plotë për KFOR-in dhe EULEX-in. Shtetet e Bashkuara dhe Shqipëria u kanë kërkuar palëve të punojnë në kuadër të Dialogut të lehtësuar nga BE për të zgjidhur çështjet shqetësuese.
Ata diskutuan mënyrat për të ndërtuar mbi arritjet historike në marrëdhëniet e mbrojtjes SHBA-Shqipëri, duke përfshirë aftësitë ushtarake dhe kontributet në rritje të Shqipërisë si një aleate e NATO-s. Ambasadori rikonfirmoi mbështetjen e fortë të SHBA-së për Shqipërinë përballë sulmeve kibernetike të Iranit.
Ambasadorja Kim i shprehu urimet e ngrohta Kryeministrit për pritjen e suksesshme nga Shqipëria të Samitit historik BE-Ballkani Perëndimor në Tiranë, duke theksuar se është hera e parë që një samit i tillë zhvillohet jashtë Brukselit. Ajo përsëriti se Shtetet e Bashkuara mbështesin me vendosmëri integrimin e plotë europian të Shqipërisë si anëtare e BE-së. Në këtë kuadër u diskutua për arritjet, por edhe sfidat në zbatimin e reformës në drejtësi në Shqipëri. Ata ranë dakord se është thelbësore që institucionet e drejtësisë në Shqipëri të jenë të pavarura dhe të patrembura në ekzekutimin e detyrave dhe përgjegjësive të tyre.
Ambasadorja Kim dhe kryeministri Rama pohuan se ndërsa mbyllim një vit që shënon 100 vjet nga vendosja origjinale e marrëdhënieve SHBA-Shqipëri, partneriteti ynë është më i fortë se kurrë.
