Presidenti Serbisë ka dhënë datën 15 dhjetor si afat, kur mund t’i dërgojë kërkesë komandantit të misionit të NATO-s në Kosovë, KFOR, për të dërguar 1.000 forca të sigurisë në Kosovë.
Vuçiç e kishte bërë këtë deklaratë që më 8 dhjetor kur foli për vendosjen e forcave të veta në bazë të Rezolutës 1244 të Kombeve të Bashkuara. Por teksa ende nuk ka një përgjigje zyrtare nga NATO, për këtë kërkesë, gjermania është e para ndër vendet e para që ka dalë kundër.
Ministrja e Jashtme Annalena Baerbock e quajti krejtësisht të paparanueshme kërkesën e Vuçiç për dërgimin e trupave në Kosovë.
“Kosova i ka ulur tensionet me shtyrjen e zgjedhjeve, por retorika e fundit e Serbisë po bën të kundërtën”, tha ajo.
Ndërkohë edhe Raportuesja për Kosovën në Parlamentin Evropian, Viola von Cramon ka thënë se kërkesa e Serbisë për kthim të ushtarëve është e papranueshme.
“Rivendosja e paqes dhe stabilitetit në veri të Kosovës duhet të jetë prioritet. Unë pres që barrikadat e serbëve të Kosovës të largohen si ulje e përshkallëzimit. Mbështetje e plotë për dialogun e udhëhequr nga BE”, tha Von Cramon ndër të tjera.
Më herët gjatë ditës edhe Përfaqësuesi i Lartë i BE-së për Politikë të Jashtme dhe Siguri, Josep Borrell, tha se përplasjet në rrugë nuk çojnë në marrëveshje
“Ne menduam se kishim arritur një marrëveshje, por serbët e Kosovës iu përgjigjën arrestimit të ish-policit serb të Kosovës me trazira në rrugë, madje ata hodhën bomba ndaj policëve tanë. Kjo është e papranueshme, e di që të dyja palët po përpiqen për de-përshkallëzimin, por duhet të kuptoni se përplasjet në rrugë nuk çojnë në arritjen e një marrëveshje”, u shpreh Borell.
Edhe Ambasadat amerikane në Prishtinë dhe në Beograd kanë bërë thirrje që të hiqen të gjitha bllokadat në rrugët e veriut të Kosovës menjëherë dhe të punohet për shtensionimin e situatës në zonë.
