Situata e tensionuar gjatë mbrëmjes së djeshme në komunat e banuara nga serbët në Veri të Kosovës ka percepituar deri në goditjen e forcave të EULEX-it, që kanë zbarkuar në terren për të mbarëvajtur rendin dhe sigurinë.
Pas sulmeve me armë dhe mjete piroteknike ndaj policisë së Kosovës që lanë të plagosur një efektiv, EULEX ka njoftuar se një patrullë e tyre është sulmuar me bombë molotovi.
EULEX informon se ndaj një patrulle vëzhguese të tyre në Rudare është hedhur një bombë çorientuese, nga e cila fatmirësisht nuk ka lëndime në njerëz e as dëme materiale.
“Ne i dënojmë fuqishëm aktet e dhunshme të kryera nga persona të armatosur në pjesën veriore të Kosovës, përfshirë kundër komunitetit ndërkombëtar”, thuhet në reagimin e EULEX.
Apelit të EULEX për palët që të përmbahen nga veprimet provokuese, i është bashkuar edhe ambasada e SHBA-ve në Prishtinë, me një mesazh të shpërndarë në Tëitter.
Ambasadori Jeff Hovenier dënon sulim dhe kërkon që përgjegjësit të ndëshkohen sipas ligjeve në fuqi të Kosovës.
“SHBA-ja i bashkohet EULEX-it në dënimin e fuqishëm të sulmit ndaj një patrullë të EULEX-it mbrëmë. Sulmet e dhunshme ndaj Policisë së Kosovës dhe personelit të sigurisë ndërkombëtare janë të papranueshme dhe përgjegjësit duhet të japin llogari përmes sistemit kosovar të drejtësisë”, shkroi Hovenier.
Njoftimi i plotë i EULEX-it:
Konfirmojmë se një bombë çorientuese (shok-bombë) është hedhur ndaj një patrulle vëzhguese të EULEX-it mbrëmjen e kaluar (10.12) në afërsi të Rudares. Asnjë zyrtar i Njësisë Policore të Specializuar të EULEX-it nuk është lënduar dhe nuk janë shkaktuar dëme materiale.
Ky sulm, si dhe sulmet ndaj zyrtarëve policorë të Policisë së Kosovës, janë të papranueshme. Ne i dënojmë fuqishëm aktet e dhunshme të kryera nga persona të armatosur në pjesën veriore të Kosovës, përfshirë kundër komunitetit ndërkombëtar.
EULEX-i do të vazhdojë të punojë me vendosmëri për ta mbështetur stabilitetin e Kosovës, në kuadër të mandatit që e ka, si dhe të kontribuojë për sigurinë e popullatës nga të gjitha komunitetet.
Apelojmë te të gjithë ata që janë përgjegjës që të përmbahen nga veprime të tjera provokuese si dhe iu bëjmë thirrje institucioneve të Kosovës që autorët t’i sjellin përpara drejtësisë.
